Dili, 07 Novembru 2025 - Universidade da Paz (UNPAZ) liuhusi Estudante klase Internasional programa MBBS komemora tinan atus ida lima-nulu (150) Inu Nasional (VANDE MATARAM) India nian, iha auditoriu MBBS UNPAZ.

Iha okaziaun ne’e, Magnífiku Reitór UNPAZ, Dr. Adolmando Soares Amaral, Lic. Eco.,MM. hateten, lori familia bo’ot UNPAZ, haksolok no kontente ho embaixador india ba Timor-Leste komemorasaun loron inu nasionál india nian iha Universidade da Paz. Família bo'ot Unpaz hato'o Parabens-parabens ba embaixador ho familia tomak iha Timor-Leste ba sira-nia selebrasaun inu nasional (VANDE MATARAM) ne'e.

Reitór Universidade da Paz ne'e haktuir, Timor-Leste foin Restaura Independensia ba dala 22, presiza aprende barak husi nasaun india.

“UNPAZ agradese ba ekipa India bele mai loke programa MBBS iha ita nia nasaun Timor-Leste, hodi fó oportunidade ba Timor oan sira atu aprende, husu ba estudante sira labele lakon tempu no aproveita, nune’e ita mós bele sai hanesan nasaun india iha tempu sira tuir mai”,dehan Reitór UNPAZ.

Enkunatu iha selebrasaun Inu Nasional (VANDE MATARAM) India nian ne'e, estudante programa MBBS mós hatudu dansa kultura, kanta muzika no halo reflesaun inklui loke vidio istoria nasaun India nian iha tempu invazaun nian. Prejensa iha eventu ne’e, Embaixador India mai Timor-Leste, Madan Kumar Ghildiyal, ho komitiva tomak, Estrutura Senadu Universidade, Senadu Fakuldade, Diretor, Xefe Unidade sira, inklui estudante MBBS iha Universidade da Paz.