Dili, 25 Setembru 2025 - Universidade da Paz (UNPAZ), liu husi Fakuldade Ekonomia, realiza mini-workshop hodi prepara ba workshop anual ne’ebe sei akontese iha inisiu fulan Outubru 2025, iha aula Prof. Dr. Lucas da Costa. Magnífiku Reitór Universidade da Paz Dr. Adolmando Soares Amaral Lic.Eco., M.M, nu’udar mós dosente ida iha Fakuldade Ekonomia hateten, estrutura Fakuldade Ekonomia presiza kompleta malu hodi lori Fakuldade ne’e ba oin, ohin loron fakuldade ne’e sai boot no koñesidu ona iha fatin hotu-hotu tanba serbisu maka’as hotu, ho estrutura ne’ebé hahú husi partidu sira fakuldade no hakarak lori ba fakuldade diak liu tan, to’o momentu fakuldade ekonomia mai ho valor akreditadu ne’ebe la fasil. Magnífiku ne’e mós husu ba dosente junior sira atu hatudu atitude di’ak ba malu entre dosente sira, liuliu ba dosente senior sira, tanba bainhira ema ida hili dalan atu sai dosente tenke iha intensaun atu hakerek livru ka artigu sientífiku hafoin publikasaun. Iha fatin hanesan Dekanu Fakuldade Ekonomia Dr. Caetano Carceres correia Lic.Eko, M.Ak hateten, mini-workshop ne’e ho objetivu atu prepara planu no atividade Fakuldade Ekonomia nian, hahu husi Dekanu Fakuldade, Vise-Dekanu, Xefe Departamentu no ba parte hotu-hotu ne’ebe involve, tanba Fakuldade iha ona rekomendasaun lubuk ida husi peritu sira ekipa (ANAA) husi ensinu superiór. Dekanu mós husu ba dosente sira liuliu estrutura Fakuldade Ekonomia presiza partisipa iha mini-workshop ne’e hodi tau hamutuk ideia sira hodi kontribui hadi’a rekomendasaun sira ne’ebé prepara ona bainhira hasoru workshop planu anuál ne’ebé sei mai. Entretantu, Magnífiku Reitór, Estrutura Senadu Fakuldade Ekonomia, Dosente sira inklui Funsionáriu Fakuldade Ekonomia partisipa iha mini-workshop ne’e.