Dili, 20 Outubru 2025 - Departamentu Teknolójia Banku RAAN, husi Fakuldade Saúde Públika e Ciénsia Médicas (FSPeCM) Universidade da Paz, hakat ba Avaliasaun Lisiensiamentu Operasionál Husi Ekipa Avaliadór husi Ministériu Ensinu Superior Siénsia Kultura (MESSK) iha Aula Prof. Dr. Lucas da Costa.

Magnífiku Reitór Dr. Adolmando Soares Amaral, Lic.Eco.,MM. hateten, bainhira atu hahú departamentu ne’e, iha ema lubuk ida ne’ebé mai fó hanoin barak ne’ebé ho pozitivu no negativu, maibé ho fiar katak, matenek ne’ebé avaliadór sira iha depois ita na’in hira iha ne’e kompleta hanoin pozitivu ita organiza aan no loron ruma, ita sei to’o fatin ida hanesan ida ne’ebé ita haree iha nasaun seluk.

Magnífiku-Reitór hakle’an, liuhusi Prezensa ita na’in hira ne'e nomós apoiu husi stakeholders sira ita hotu-hotu mai tau hanoin hodi organiza no prepara kondisões mínima atu hatan ba ezijénsia nesesidades ba futuru, nune’e husu ba Xefe-departamentu ho ekipa no fakuldade sira liliu ekipa médikus koa’lia ba buat ne’ebé ita-bo’ot sira hakerek no hatan ba saida maka ita-bo’ot sira halo, seluk ne’e entrega ba avaliadór sira atu deside, Departamentu ida ne’e liu ka la liu i atu hetan lisensa ka lae, depois avaliadór sira maka bele define no bele halo desizaun ruma ne’ebé sei entrega ba MESSK depois mak bele anúnsiu ba ita.

Iha fatin ne’ebé hanesan, reprezentante MESSK, Ana Elizete de Jesus Neves hatutan, ohin loron ita hotu hamutuk iha fatin ne’e liuhusi prosesu lubuk ida, maibé ohin loron ita avánsa ba avaliasaun hamutuk ho ita-nia avaliadór sira, iha momentu ne’e ami husi ekipa MESSK la halo intervensaun ruma ba saida de’it, maibé ami mai akompaña de’it no ami nia kompeténsia tomak entrega ba avaliadór sira hodi bele halo avaliasaun ba ita nia kursu ne’ebé iha.

Avaliasaun Lisensa Operasionál ba Kursu Banku de RAAN ne’e partisipa husi, Magnífiku Reitór ho Nia Estrutura, Ekipa MESSK, Ekipa Avaliadór Nasionál DR. Raimundo dos Santos no DRA. Salma Sagram, Dekanu FSPeCM ho nia Estrutura, Vise-Reitór, Pro-reitóres, Dekanu husi fakuldade neen no Xefe Departamentu sira, Diretóres Unidades inklui Dosentes no Funsonáriu.