![VISE REITOR ASUNTU KOOPERASAUN KONVOKA REUNIAUN HO SRA. TAKAI KUMIKO](https://unpaz.tl/asset/foto_berita/129.jpg)
VISE REITOR ASUNTU KOOPERASAUN KONVOKA REUNIAUN HO SRA. TAKAI KUMIKO
Dili-Universidade da Paz (UNPAZ) nia Vise Reitor Asuntu Kooperasaun, Sr. Luis Pereira Cardoso, Dip.Cs.Lic.CSH.MA. Mcs, hala’o reuniaun ho Sra. Takai Kumiko, husi Nihon Fukushi University nu’udar mós Assistant Profesor husi Nagoya University, hodi ko’alia kona-ba peskiza ne’ebé mak Sra. ne’e sei hala’o durante semana balun iha Fakuldade Saúde Públika UNPAZ, iha Vise nia kna’ar fatin (12/01).
Vise ne’e, relata, Sra. Takai Kumiko hanesan Assistant Profesor nomós hanesan estudante Ph.D. nia mai iha UNPAZ liuliu iha Fakuldade Saúde Públika hodi hala’o peskiza, tanba ne’e, Sra. ne’e mós hasoru ona dekanu fakuldade saúde públika ho estrutura, no ohin nia hakarak hasoru magnifiku reitor, maibe magnifiku ukupadu, nune’e sira mai hasoru ha’u iha fatin.
Nia hatutan, Sra. ne’e husi Nihon Fukushi University, maibe tanba ita halo ona kolaborasaun ho Nagoya University, tanba Sra. ne’e nia profesor husi Nagoya University, ho ida ne’e mak nia hetan suporta husi Nagoya University, hodi mai hala’o peskiza iha ne’e, no iha tempu badak nia sei ba iha Manatutu, aleinde ida ne’e, nia mós sei aula hamutuk ho estudante sira husi fakuldade saúde públika.
“Liuhusi enkontru ne’e mós ita esplora buat balu, tanba iha nia universidade departamentu barak mak hanesan mós ita nian, tanba ne’e ita husu ba nia atu fasilita ita durante nia prezensa iha ne’e, no iha tempu oin mai ita bele halo kooperasaun no kolaborasaun ho Nihon Fukushi University iha futuru, ida ne’e oportunidade di’ak liuhusi kooperasaun ne’ebé mak ita atu estabelese bele apriende liu tán husi universidade ne’ebé mak iha esperiensia barak”,dehan Nia.
Iha reuniaun ne’e, akompaña mós husi dosente na’in rua husi Fakuldade Saúde Públika, nune’e mós Vise Reitor Asuntu Kooperasaun, Sr. Luis Pereira Cardoso, Dip.Cs.Lic.CSH.MA. Mcs. ho Sra. Takai Kumiko.