VICE REITOR ASUNTU KOPERASAUN HALO DISKUSAUN HO EKIPA KOICA

VICE REITOR ASUNTU KOPERASAUN HALO DISKUSAUN HO EKIPA KOICA

Dili-Universidade da Paz (UNPAZ) Nia Vice Reitor Asuntu Koperasaun Interna no Externa, Sr. Luis Pereira Cardoso, Dip.Cs.,Lic. CSH.,MA.,Mcs. akomña husi Dekanu Fakuldade Teknologia Agrikola, halo diskusaun ho ekipa KOICA (Agensia Koperasaun Internasional Korea de Sul) hodi hametin koperasaun iha área Agrikultura nian, iha Kampus UNPAZ (22/02).

Vice Reitor Asuntu Koperasaun Interna no Externa, Sr. Luis Pereira Cardoso, Dip.Cs.,Lic. CSH.,MA.,Mcs. hateten ida ne’e oportunidade di’ak tanba iha semana kotuk sira mai iha ne’e ita halo diskusaun, sira koko esplika kona-ba sira nia projetu ne’ebé implementa iha Timor ba iha área agrikultura nian.

Nia hatutan, iha diskusaun ne’e ekipa KOICA mós apresia tebes tanba ita simu ho di’ak, ohin sira mai atu komfirma lolo’os kona-ba planu survei ne’ebé mak atu halo iha Fulan Abril, espera ho prejensa sira nian ita bele halo hamutuk survei ne’e, depois de survei iha futuru sira mós sei tau sira nia professor lubuk ida iha UNPAZ, dodi dezenvolve seitór agrikultura, ekonomia nomós seluk tán iha UNPAZ.

“Iha tempu badak sira sei foti desizaun katak, sira sei hili UNPAZ ba projetu refere, projetu ne’e benefisiu tebes ba iha universidade liu-liu ba iha Fakuldade Teknologia Agrikola, tanba husi koperasaun ne’e ita hetan parseiru di’ak ida husi Korea, liuhusi KOICA atu dezenvolve hamutuk”dehan Nia.

Vise Reitor Asuntu Koperasaun, klarifika, primeiru sira sei halo survei ba iha distritu tolu hanesan, Ainaro, Aileu, no Liquisa, tanba iha tempu mai sira sei tau professor lubuk ida iha ne’e, ita mós sei halo programa intensivu hamutuk, estudante husi Korea mai iha UNPAZ, ita nia estudante mós sei ba iha Korea.

Partisipa iha diskusaun ne’e, Vice Reitor Asuntu Koperasaun Interna no Externa, Sr. Luis Pereira Cardoso, Dip.Cs.,Lic. CSH.,MA.,Mcs. akomña husi Dekanu Fakuldade Teknologia Agrikola, nomós ekipa KOICA (Agensia Koperasaun Internasional Korea de Sul).