UNPAZ-TIMOR-LESTE AND AUSTRALIA YOUTH CONFERENCE

UNPAZ-TIMOR-LESTE AND AUSTRALIA YOUTH CONFERENCE

Dili-Universidade da Paz (UNPAZ) liuhusi Senadu Fakuldade Direitu realiza konferénsia,Timor-Leste and Austrálian Conference ho tema “Perspective Of Timorese and Austrálian On Youth Participation ln Development”, iha Salaun José de Casmiro (10/07).

Reprezentante Magnifiku Reitór UNPAZ, Vise-reitór asuntu akadémiku Sr. Joaninho Xavier Hei, Lic.CSH.,M.Ed. hato’o agradese ba komisaun organizadóra ne’ebé organiza eventu ida ne’e, ho hanoin katak, ida ne’e importante tebes ba ita-bo’ot sira atu apriende, tanba apriende la’os iha aula de’it, maibe bele apriende mós husi fatin seluk.

“Importante tebes ba ita-bo’ot sira oinsá bele apriende husi speakers sira ne’ebé mak mai, tanbá sira mak prátika barak liu iha liur. Imi la’os de’it apriende iha aula maibé imi mós bele apriende iha fatin seluk. Tan ne’e, prepara imi nia aan ho di’ak ba matenek sira ne’ebé mak peritus sira sei fahe ba imi. Imi nu’udar estudante pilar tolu ne’ebé importante atu dezenvolve imi nia aan mak liuhusi atitude koñesimentu no badaen. Iha estudante barak seidauk gradua asesu ona kampu traballu, tanba sira prepara aan no jere tempu ho di’ak, karik imi oras mamuk bele inklina aan iha atividade sira ne’ebé mak iha nomós iha formasaun sira seluk, tanbá ita agora ne’e iha era dizitalizasaun no tenki iha koñesimentu oioin hodi prepara imi nia aan ho di’ak ba iha futuru”,tenik Vise.

Nune’e mós Koordenadór Nasionál Educate the Future Sr. Camilo Fatima, enkoraja estudante universitáriu sira katak, iha eskola sei la hanorin ita oinsá atu servisu, maibé ita presija dezenvolve ita-nia skills iha terenu liuhusi dalan sira ne’ebé mak ita apriende ona hanesan voluntáriu. Atu servisu ne’e susar maibé fásil bainhira ita ho fuan, iha abilidade hakarak atu apriende duni, ha’u enkoraja nafatin imi labele baruk atu hakat ba oin no koko atu sai husi imi-nia zona ne’ebé livre, atu nune’e sai husi universidade ida ne’e karik, imi sai ema ne’ebé mak di’ak liu hodi kontribui ba edukasaun iha Timor-Leste.

Iha fatin hanesan Principle of Dili International School Sr.Tim Blachman, informa hanesan joventude nu’udar mós estudante, ita-nia papél mak oinsá atu apriende no fahe ita-nia koñesimentu ba ema seluk, tanbá ita la’os apriende ba ita-nia aan de’it, maibé ita mós presija fahe ba ema seluk. Nu’udar joventude ita-nia papél importante ba dezenvolvimentu iha Timor-Leste mak ita-hotu, tenki prepara aan ho di’ak ba futuru.

Sorin seluk dekanu fakuldade Direitu, Dr. Leonito Ribeiro SH.,MH mós afirma, tópiku ne’e importante oinsá bele dezenvolve foinsa’e ba partisipasaun dezenvolvimentu estadu ninian, tanbá joven mak ai-riin ba nasaun, tan ne’e ai-riin mak tenki forte. Ho ida ne’e, imi tenki prepara aan ho di’ak, ho ida ne’e aprésia tebes ba kooperasaun ne’ebé iha, tanbá estudante sira bele apriende buat ruma, atu bele dezenvolve aan ho di’ak ba nasaun no ba sosiedade.

Partisipa iha konferénsia ne’e, Vise-reitór asuntu akadémika Sr. Joaninho Xavier Hei, Lic.CSH.,M.Ed, dekanu Koordenadór Nasionál Educate the Future Sr. Camilo Fatima ho nia estrutura, Principle of Dili International School Sr.Tim Blachman ho nia estrutura, fakuldade Direitu, Dr. Leonito Ribeiro SH.,MH ho nia estrutura no mós sivitas akadémika sira hotu iha Universidade da Paz.