UNPAZ-SERIMONIA TOMADA DE POSE SENADU ESTUDANTIL TINAN AKADEMIKU 2021-2022

#UNPAZ# 20 NOVEMBRU 2021

UNPAZ-SERIMÓNIA TOMADA DE POSE SENADU ESTUDANTIL TINAN AKADÉMIKU 2021-2022

Dili-Universidade da Paz (UNPAZ) hala’o atividade Serimónia Tomada de Pose Senadu Estudantil ba Tinan Akadémiku 2021-2022, iha Salaun José Kasimeiru UNPAZ (20/11).

Magnifiku Reitór Universidade da Paz, Dr. Adolmando Soares Amaral, Lic, Eco. MM, hateten iha serimónia tomada de pose ne’e, ita hotu hamutuk sai forsa ida para atu asegura ita nia polítika universidade nian, agradese ba estrutura sesante ne’ebé durante tinan ida apoiu polítika universidade nian liu-liu konsentra ba atividades estudante extra kurikulaer, maske iha situasaun covid-19 maibe atividade lubuk ida sira bele halo nomós partisipa.

"Estrutura eleitu sira buat ne’ebé imi bele kontinua, no buat foun ne’ebé imi atu hamosu bele hamosu, naran katak, buat ne’ebé imi atu kontinua no hamosu ne’e tenki kontribui ba UNPAZ, iha fatin ida ne’e ha’u enkoraja estudante sira atividade sira ne’ebé di’ak ba ita bo’ot sira, di’ak ba universidade, di’ak ba nasaun no benefisiu ba ita nia povu halo de’it labele tauk", haktuir Reitór.

Pro Reitór Asuntu Estudantil, Sr. Julio da Silva Salsinha, Lic. CSH. Agradese ba senadu estudante sesante ho nia estrutura durante iha tinan ida nia laran kopera masimu tebes iha nivel universidade nian, ba programa sira ne’ebé durante ne’e iha ho responsabilidade tomak ne’ebé nia iha.

"Hanesan estudante ida ne’e mak sai hanesan motivasaun, no sai esperiensia ba ita bo’ot sira aban bairua ita bo’ot sira lider iha instituisaun ruma ida ne’e mak sai hanesan bokae ba ita bo’ot sira", Sr. Julio.

Apresia no agradese ba estudante sira hotu iha UNPAZ, ita bo’ot sira hili ona ita bo’ot sira nia estrutura ne’ebé agora dadauk atu hamutuk ho ita bo’ot sira iha tinan ida nia laran, hodi haree ba programa tomak ne’ebé universidade trasa ona, hodi servisu hamutuk hodi hamahan estrutura iha asuntu estudantil nia okos ho programa tomak ne’ebé ita planeia, atu resposta programa husi universidade nian, dehan Nia.

Xefe Senadu Estudantil Sesante, Sr. Januario Colo, hatutan iha nia diskursu, ohin la’os ikus mai ha’u hodi hamrik iha ita bo’ot sira nia oin, maibe ikus mai ha’u ho kna’ar hanesan senadu estudantil Universidade da Paz iha ita bo’ot sira nia oin, falta minutu balu atu husik hela kna’ar hanesan senadu estudantil Universidade da Paz ba iha senadu eleitu estudantil Universidade da Paz.

Xefe Senadu Estudantil Eleitu , Sr. Bernadino Ximenes, ha’u konsiente katak sai senadu ne’e la fasil no sai ajente transformador no halo aspirasaun estudante nian la fasil, maibe ha’u garante katak, wainhira ita hamutuk ita sei halo mudansa iha Universidade da Paz, prinsipal iha programa interna no externa nian

"Orgullu tanba bele lori aspirasaun estudante ba iha futuru oin mai, imi nia terus no susar mak sai ha’u nia terus no susar, imi nia problema mak sei sai ha’u nia problema, firme nafatin hodi garante estabilidade iha UNPAZ, ha’u mai la’os atu hodi servi, maibe ha’u mai atu servidór, signifika katak servi imi, ha’u mai la’os tanba oportunidade, maibe ha’u mai tanba responsabilidade", katak Nia.

Partisipa iha Serimonia ne’e, Magnifiku Reitór Universidade da Paz, Dr. Adolmando Soares Amaral, Lic, Eco. MM, ho Estrura Pro Reitór. Dekanu sira, Dosente, Funsionariu, Pro Reitór Asuntu Estudantil, Sr. Julio da Silva Salsinha, Lic. CSH, ho Estrurtura, Inklui Estudante hotu iha UNPAZ.