UNPAZ-JHN KOMEMORA LORON INTERNASIONAL JUVENTUDE

UNPAZ-JHN KOMEMORA LORON INTERNASIONAL JUVENTUDE

Dili-Universidade da Paz (UNPAZ) liuhusi Joventude hadomi natureza (JHN) komemora loron internasional joventude 12 de Agustu 2022 ho nia Tema “Ho Natureza Joventude Agora Lidera iha Futuru, iha Salaun José Casimiro (12/08).

Diretór Estra kurikuler, Sr. Quintiliano Fernades Barros Lic. SP. MSP, hansan mós Konselleru ESHANA-UNPAZ hateten, hanesan Joventude tenki envolve a’an iha atividade oioin, atu nune’e bele kapasita mentalidade, kapasidade homós koñesimentu ne’ebé naton atu nune’e bele lidera ema seluk iha futuru.

“Molok ita atu hadia ema seluk, ita tenki hadia uluk ita nia a’an, tanba ne’e joventude mak rin ba nasaun, se ita mak rin ba nasaun, rin ne’e tenki forti didia’ak lori nasaun ne’e ba oin”,dehan Sr.Quintiliano.

DNCJ Sr. Cesarino da Silva Lic. AP. QIA. hatutan ohin loron 12 de Agustu hanesan loron internasional ba joventude sira ne’ebé mak Nasõens Unidas hili ona loron importante ida ne’e iha 1998 iha konfrensia mundial ne’ebé hala’o iha Lisboa, deside katak loron 12 de agustu ne’e loron importante ba joventude hotu-hotu no sai loron internasional iha mundu.

“Iha Timor mós ita komemora loron importante ida ne’e tanba ne’e mak ita hili munisipiu ida, no Munisipiu Baucau mak sai fatin no sasin ba Komemora loron internasional joventude”,tenik Nia.

Nia reforsa, atividade ida ne’e hodi komemora loron joventude, nune’e mak ita realiza atividade hanesan Duasaun Ran, no ita mós iha atividade sira seluk hanesan workshof seminariu, ida ne’e mak akontese iha Munisipiu Baucau no ohin ESHANA-UNPAZ mós komemora loron internasional ida ne’e.

Entretantu komemorasaun loron internasional ida ne’e, loke abertura husi, Diretór Estra kurikuler, Sr. Quintiliano Fernades Barros Lic. SP. MSP. no hetan orador prinsipal husi reprejentante DNCJ Sr. Cesarino da Silva Lic. AP. QIA. Distinta Deputada, Sra. Elviana Souza de Carvalho. Reprejentante Prezidente Comite 12/Sobrevivente 12 de Novembru, Sr. Manuel de Jesus Saldanha. partisipa husi organizasaun sira husi JHN nian, inklui estudante sira iha UNPAZ.