UNPAZ-HALO GRAUASAUN BA FINALISTA NAIN 492 BA FAKULDADE 3 FAZE DARUAK

#UNPAZ# 29 DEZEMBRU 2021
UNPAZ-HALO GRAUASAUN BA FINALISTA NA’IN 492 BA FAKULDADE 3 FAZE DARUAK

Dili-Universidade da Paz (UNPAZ) hala’o Serimónia Graduasaun ba Lisensiatura ba da XV ba Fakuldade tolu (3) Ekonomia Enjeñaria Teknologia Agrikola ho Finalista hamutuk na’in atus haat sia nulu resin rua (492) total finalista husi etapa primeiru no segundu hamutuk (1.092) tema ba Serimónia refere ”Lisensiadu/a UNPAZ Prontu Atu Halo Inovasaun no Sira Nia Kreatividade Iha Tempu Pandemia”,tinan akadémiku 2021, Iha Salaun José Kasimiru (29/12).

Magnifiku Reitór Universidade da Paz, Dr. Adolmando Soares Amaral, Lic.Eco.,MM. hateten ohin graduasaun ba Lisensiatura ba dala XV Mestradu ba dala V, sira ne’e hotu la’os ema ida mak halo, sira ne’e hotu tanba ita hotu nia hamutuk, inan aman ita bo’ot sira ho estatutu hanesan estudante, tantu semester 2,4,6, no ita bo’ot sira ne’ebé sai ona alumi, ita bo’ot sira hotu nia apoiu ita hamutuk mak sai forsa ida bele aguenta existensia UNPAZ ohin loron bele tama ba tinan (18) iha Timor, husi tinan (18)UNPAZ oferese ona rekursus humanu ba sosiedade ba povu no rai ida ne’e hamutuk (14.880) ne’ebé namkari iha teritoriu tomak.

Nia hatutan, Ohin loron ita bo’ot sira bele kontente no haksolok ho inan aman no familia sira, tanba sira nia sakrifisiu mak ohin ita bo’ot sira to’o iha faze ida ne’e, maibe ha’u fiar katak ita bo’ot sira sei hasoru oportunidade iha oin ne’eba, dala ida tán husu ba ita bo’ot sira wainhira hetan pozisaun ruma kualker iha fatin ne’ebé de’it, asumi ba konsidera ba pozisaun sira ne’e ho responsabilidade, labele konsidera pozisaun sira ne’e hanesan oportunidade.

“Ita bo’ot sira labele konsidera pozisaun sira ne’e hanesan oportunidade, maibe konsidera pozisaun sira ne’ebé ita bo’ot sira hetan iha tempu tuir mai ho responsabilidade, katak ita bo’ot sira ba la’os atu ukun sira, maibe ita bo’ot sira ba atu servi ita nia povu ida ne’e, no atu fó kontribuisaun masimu ba dezenvolvimentu ba rai ida ne’e”, dehan Reitór.

Kontribuisaun liuhusi matenek ne’ebé ita lok ba malu iha fatin ida ne’e, responsabilidade moral ita hotu ba dezenvolvimentu ba rai ida ne’e, responsabilidade ita hotu nian, labele de’it sira iha governu no iha liur, ita sira ne’e hahú ohin, ita iha responsabilidade moral, atu fó kontribuisaun ba povu ida ne’e nia moris di’ak no dezenvolvimentu ba rai ida ne’e, tenik Nia.

Reitór, Agradese ba inan aman sira ne’e ohin loron sei tau nafatin fiar ba UNPAZ, afirma nafatin ita bo’ot sira nia pozisaun hodi kontinua haruka ita bo’ot sira nia oan mai iha fatin ne’e, ba graduadu sira imi tenki hatudu imi nia matenek, badaen, atitude sosiedade tenki simu.

Reprezentante Inan Aman ba Graduadu/a, Sr. Françisco Antonio Coreia, sente ohin loron espesial ida mai ami basa terus no susar hotu ne’ebé ami ida-idak infrenta, hodi suporta ami oan sira nia estudu, durante tinan hirak nia laran, la monu le’et de’it ba rai, maibe iha duni rezultadu ba graduasaun ba oan sira iha loron ohin.

“Ami inan aman, agradese no obrigadu wain ba Magnifiku Reitór, ho nia estrutura tomak iha Universidade da Paz, ne’ebé ho pasensia no dedikasaun tomak, hodi eduka no fornese fasilidade oi-oin ba ami nia oan sira hodi bele aprende no ohin sira bele finaliza sira nia estudu iha UNPAZ”, haktuir Françisco.

Reprezentante Graduadu/a, Domingos Joni Oliveira, agradese no gratidaun ba parte hotu ne’ebé durante kontribui ona apoiu masimu mai ami hodi hala’o estudu iha fatin ne’e, UNPAZ hanesan uma mahon ida mai ami iha tinan haat resin ami lubun bo’ot ne’e hala’o prosesu aprendisajen iha fatin ne’e, oinsa atu haklean siénsia ne’ebé iha hodi halo diskusaun aprezentasaun no servi komunidade liuhusi servisu komunitariu.

Nia esklarese, UNPAZ mós partilla ona lisaun importante barak mai ami, kona-ba oinsa atu dedika a’an ba estuda no servi, mesmu ho limitasaun no kondisõens ne’ebé ami infrenta, maibe ho mentalidade ne’ebé forte tebes ami bele ultrapasa buat sira ne’e hotu, nune’e ohin loron ami hateten, ami prontu servi povu no rai doben ida ne’e.

“UNPAZ hanorin ami atu labele tabele iha elefante nia ikun, maibe tenki brani sai hanesan nehek nia ulun, katak iha Universidade ne’e mak hanorin ami atu bele hamrik mesak mesmu iha limitasaun barak ne’ebé ami hasoru, maibe ho profisionalizmu kreatividade no inovativu, nu’udar graduadu ami prontu atu servi kualker situasaun no kondisaun saida de’it”, katak Nia.

Partisipa iha Serimónia Graduasaun ne’e, Magnifiku Reitór Universidade da Paz, Dr. Adolmando Soares Amaral, Lic.Eco.,MM. Prezidente Fundasaun Neon Metin, ho estrutura, Diretór Pos Graduasaun, Dr. Deonizo Babo, Pro Reitor, Dekanu, Diretór/a Unidade sia, Xefe Departamentu sira, Dosente, Funsionariu, Komvidadus hotu, inklui Estudante sira.