![UNPAZ-FSP HO PLAN INTERNASIONAL REALIZA SEMINARIU NASIONAL](https://unpaz.tl/asset/foto_berita/309968497_464100219070929_2778400868604008987_n.jpg)
UNPAZ-FSP HO PLAN INTERNASIONAL REALIZA SEMINARIU NASIONAL
Dili-Universidade da Paz (UNPAZ) liuhusi Fakuldade Saúde Públika hamutuk ho Plan Internasional, hodi realiza seminariu nasional, ho tema “Estudante Mak Ajente ba Mudansa Iha Sosiedade, Prevene Isin Rua no Kaben ho Minoridade no Violénsia”,iha Salaun Jose Kasimiru (29/09).
Vice Reitor Asuntu Estudantil no Antigus Alunus, Sra. Marilia Juvi Gonsalves, Lic SP.,M. Kes. ne’ebé reprejenta Magnifiku Reitór UNPAZ, hateten seminariu ida ne’e importante tebes, liuliu ba iha estudante sira nomós joventude foion sa’e sira.
Nia hatutan, joventude ne’e, foin sae, ne’e siak no ran manas, ho liafuan ida siak ne’e, haluha hotu ita nia an, lakoi kontrola ba ita nia orgaun reprodutiva ne’e rasik, seminariu koa’lia kona-ba saúde reprodutiva, ema tauk atu rona, maibe sira latauk atu halo, ida ne’e mak difikuklta ita to’o agora.
“Seminariu ida ne’e fó hanoin ita, atu bele loke hanoin, koa’lia kona-ba saúde reprodutiva, tanba ne’e imi lubun ida ne’ebé mak partisipa iha ne’e, labele rona de’it, maibe tenki hatene saida mak ha’u halo atu prejudika ha’u nia futuru, ha’u la koi halo”,dehan Vice Reitor Asuntu Estudantil no Antigus Alunus, Sra. Marilia.
Reprezentante PITL, Sr. Pedro Capelão, orgullu tebes ho seminariu ida ne’e, tanba parte husi plan nia komitmentu mós, oinsa atu promove labarik no joven sira atu sai ajente ba mudansa.
Nia salienta, atividade ida ne’e mós nu’udar parte aplikasaun mós MoU ne’ebé plan internasional ho UNPAZ asina iha tinan liu ba, hodi servisu hamutuk, atu bele fó hanoin no kapasitasaun ita nia joventude sira atu bele dezenvolve sira nia an, no deside sira nia moris.
“Liuhusi ita nia kooperasaun no servisu hamutuk ida ne’e, sei haforsa liu tán, atu ita labele husik ema ida iha kotuk liuliu ba joventude sira iha Timor-Leste”,tenik Sr. Pedro.
Entretantu iha seminariu nasional ida ne’e, hetan mós oradór prinsipal hanesan, Eng. Mariano Assanami Sabino. Koa’lia kona-ba, Joven mak ajente ba mudansa iha estadu direitu demokrátiku, Diretora, PITL, Sra. Yunita Godinho, koa’lia kona-ba, Prevene isin rua no kaben ho minoridade no oinsa hakat ba oin iha situasaun ne’ebé enfrenta. Reprejentante Ministeriu Saúde, Sra. Natalia Araujo, ko’alia kona-ba, Importánsia ba joven-estudante iha koñesimentu kona-ba saúde sexual no reprodutiva. Mario Joe da Costa Nunes, ko’alia kona-ba, Programa labarik feto ho teknologia.
Partisipa iha atividade refere, Vice Reitor Asuntu Estudantil no Antigus Alunus, Sra. Marilia Juvi Gonsalves, Lic SP.,M. Kes. ho Estrutura tomak husi Fakuldade Saúde Públika, Reprezentante PITL, Sr. Pedro Capelão, ho Estrutura, inklui estudante sira hotu iha Universidade da Paz.