UNPAZ-FAKULDADE ENJENARIA REALIZA JUDISIUM BA FINALISTA NAIN 199

#UNPAZ# 21 DEZEMBRU 2021
UNPAZ-FAKULDADE ENJEÑARIA REALIZA JUDISIUM BA FINALISTA NA’IN 199

Dili-Universidade da Paz (UNPAZ) liuhusi Fakuldade Enjeñaria realiza judisium ba dala V Departamentu Enjeñaria Sivil ba dala XV Departamentu Arkitetura no Enjeñaria Indústia ho total finalista atus ida sia nulu resin sia (199) tinan akdémiku 2021 ho tema jeral ba atividade refere ”Sai alumi ho Kualidade no Responsabilidade Liu Husi Kreativu no Inovativu ho Karater Empreendedorismu” iha salaun José Kasimiru (21/12).

Magnifiku Reitór Universidade da Paz, Dr. Adolmando Soares Amaral,m Lic.Eco.,MM. afirma iha iha atividade judisiun, nafatin Enkoraja finalista sira ligadu ho palestra siéntifiku ne’ebé aprejenta husi Ir. Rui Castro, ne’e atu dezafia ita para aban bainrua no ba futuru, oinsa UNPAZ bele organiza a’an hodi hatan ba konseitu inovativu sira ne’ebé ohin aprezenta.

″Ita lalika hanoin atu halo buat bo’ot, maibe ita hahú halo buat ki’ik ida ohin ita hatudu ba inan aman sira, ita fiar katak ita sei aumenta nia kuantidade iha tempu sira tuir mai, hahú ho buat ki’ik ita sei dumina merkadu, depois ema konsume ona ita nia produtu, mak loron ida iha tempu ne’eba sosiedade mak hatete universidade halo ona buat bo’ot, la’os ita mak hatete ita halo buat bo’ot″, tenik Reitór.

Dekanu Fakuldade Enjeñaria, Sr. José Manuel Maniquin, AP.,Lic.Eng.,M.Eng. hatutan makina produs, Kafe Ut, Produs Aifarina, no Maek, ne’e produs husi finalista Industria ne’ebé hahú tinan lima nia laran, sira nia finalidade mak makina ne’ebé tau hela ne’e.

Inan Aman sira durante tinan haat/lima ita bo’ot sira haruka oan sira mai iha Universidade da Paz, ami tane sira hahú tama mai to’o ohin, liman ida no ain ida la tohar, matan ida mós ladelek, ohin sira 199 tur iha fatin ne’e, buat sira ne’e hotu tanba ami koidadu sira ho fuan ho laran, tanba komfiansa mai husi inan aman sira.

″Alin judisista sira, labele baruk atu estuda no le’e, tanba bainhira baruk estuda no le’e, maka sei sai na’in ba pasadu, maibe banhira badinas estuda no le’e nafatin, sei sai na’in ba futuru″, Dekanu Fakuldade Enjeñaria, Sr. José.

Reprezentante Inan Aman, Sr. Alfredo Pereira, katak ami inan aman laiha buta mutin no mean fó ba manorin na’in sira, maibe ami bele dehan de’it agradesemnetu ba manorin na’in sira hotu nia sakrifisiu no dedikasaun tomak hodi eduka ami nia oan sira to’o finalidade.

″Besi ida ami haruka mai ne’e, besi kleuk ami la hadia, katak besi ne’e konsege dada sai lo’os, hodi hari’i edifisiu ida, maibe ohin mosu iha ita hotu nia le’et, besi ne’e Magnifiku Reitór ho Dosente sira hotu iha UNPAZ konsege dada besi ne’e, ikus mai ba futuru atu haree dezenvolvimentu edukasaun di’ak iha futuru.″, dehan Sr. Alfredo.

Reprezentante Judisista, Jony Oliveira, hateten iha oportunidade ida ne’e senti ondradu hanesan reprezentante judisista hotu iha Fakuldade Enmjeñria, hodi hato’o agradesementu no gratidaun ami nian ba parte hotu ne’ebé fó ona apoiu ami durante prosesu aprendisajen iha Unbiversidade da Paz.

″Ohin loron sai loron espesial mai ami ida-idak nia moris iha serimónia judisium ida ne’e, momentu ida ohin sai hanesan historia ida iha jornada prosesu aprendisajen iha nível akadémiku nian, ohin bele termina ho titulu Lisensiatura Teknika, agradese ba inan aman no familia sira hotu ne’ebé kontribui ona no apoiu masimu mai ami ida-idak, hodi aprende buat ruma, loron ida bele benefisia ami ba futuru ida nabilan”, haktuir Jony.

Partisipa iha Serimónia Judisium Fakuldade Enjeñaria, Magnifiku Reitór Universidade da Paz, Dr. Adolmando Soares Amaral,m Lic.Eco.,MM. Estrura Tomak Kompostu husi Pro Reitor sira, Dekau Fakuldade Neen, Xefe Deparatmentu sira, Reprezentante husi Prezidente Fundasaun Neon Metin, Diretór/a Unidade sira, Dosente, Funsionariu, Inan Aman, Komvidaus hotu, Judisista sira, inklui Estudante hotu iha UNPAZ.