UNPAZ-ESTUDANTE FTA PRATIKA HALO TUA SABU HUSI AIFUAN

UNPAZ-ESTUDANTE FTA PRATIKA HALO TUA SABU HUSI AIFUAN

Dili-Universidade da Paz (UNPAZ) nia estudante husi Fakuldade Teknologia Agrikultura Departamentu Prosesamentu aihan, Semester IV halo pratika aifuan sai ba tua sabu, iha salaun José Casemiro (21/10).

Xefe Departamentu Teknologia Prosesamentu Aihan, Sr. Domingos Taeque, S. TP.,M. Agr. hateten, bazeia ba moto ka lema husi Magnifiku Reitór katak, reforma no kualidade, entaun ita haree ba ita nia estudante sira bele produs aihan lokal hotu-hotu bele sai ba aihan ne’ebé maka modernu, tanba ne’e ha’u lori materia ida naran teknolojia alimentasaun, iha hanoin ida katak, aihan ne’ebé maka iha gula ka alimentar ne’ebé muda iha prosesu ba halo tua.

“Tanba ne’e mak ha’u iha inisiativa ho estudante sira para bele produs aifuan hotu-hotu bele sai ba tua, mais ita bo’ot sira haree iha rejultadu ne’e katak, la’os ai fuan ainanas ho hudi de’it mak bele produs ba tua, maibe ai fuan hotu hotu bele produs sai tua, karik ita iha inisiativu ne’ebé mak diak”,dehan Nia.

Estudante Dominita Amaral Pinto, orgullu tebes, tanba ami foin mak semester IV, maibe ami halo pratika ona hanesan halo tua husi ai nanas no husi aifuan sira seluk, ami senti orgullu tebes, ami bele halo produtu ai nanas no hudi sai fali ba tua sabu.

Tanba ne’e husu ba Dosente sira iha Universidade ida ne’e, labele hanorin teoria de’it iha aula laran, maibe koko mós halo pratika ituan, para estudante sira mós bele aumenta koñesimentu ho teoria ne’ebé maka aprende iha aula laran, liuhusi pratika halo estudante sira bele hanoin fali materia ne’ebé mak nia aprende liu ona, Nia Rekomenda.