UNPAZ-ESTUDANTE FSP 325 SEI HALO PAK IHA MANATUTU

UNPAZ-ESTUDANTE FSP 325 SEI HALO PAK IHA MANATUTU

Dili-Universidade da Paz (UNPAZ) nia Estudante atus tolu, rua nulu resin lima (325), husi Fakuldade Saúde Públika ohin husi dili viagen ba Munisipiu Manatutu, Postu Administrativu Laclo, hodi halo Atividade Pratika Kampu (PAK), durante semana rua, iha Salaun José Kasimiru UNPAZ (02/04).

Magnifiku Reitór Universidade da Paz, Dr. Adolmando Soares Amaral, Lic. Eco.,MM. hateten atividade hotu-hotu ita aposta ona iha kalendáriu akadémiku, kada tinan ita iha estajiu rua, estajiu sosiais no estajiu profisonal, estajiu profisional akontese ba estudante sira husi semester 5-6, estajiu sosiais akontese ba estudante semester 7-8.

Nia hatutan, ita iha tinan ida ne’e hahú 25 Abril 2022 to’o 25 Maiu 2022, Fakuldade 6 sei ba halo estajiu profisional, hahú ohin ita bo’ot sira husi Fakuldade Saúde Públika, ba iha Munisipiu Manatutu Postu Administrativu Laclo, hodi hala’o atividade sira tuir mata dalan ne’ebé iha.

Reitór Salienta, durante tinan rua ita bo’ot sira halo prosessu aprendisajen iha Universidade da Paz, iha momentu ida ne’e, ita bo’ot sira fila fali ba iha komunidade atu hatudu ba komunidade katak, durante tinan rua ita bo’ot sira aprende siénsia no teknologia hamutuk ho ita bo’ot sira nia dosente sira iha Universidade da Paz barak ka ituan, ita bo’ot sira fila fali ba iha komunidade, demostra ba iha komunidade sira liuhusi atividade estajiu profisional ida ne’e.

“Husi atividade ida ne’e mak, komunidade sira bele hatene Universidade ida ne’e bele sai alternativa ba prosessu dezenvolvimentu no lori povu ba moris di’ak iha rai ida ne’e, hahú husi ita bo’ot sira wainhira ita bo’ot sira bele halo buat ruma di’ak ba rai ida ne’e no nia efeitu ba povu nia moris di’ak”,dehan Reitór Unpaz.

Reitór reforsa, atu ko’alia kona-bá “Reforma no Kualidade” la’os Reitór mesak ho Dekanu Xefe Departamentu no Dosente sira de’it, maibe ita hotu-hotu sura ho ita bo’ot sira mai to’o estrutura, ita hotu-hotu nia kontribuisaun liuhusi ita nia asaun ema haree katak, bele sai alternativa ba dezenvolvimentu no lori povu ba moris di’ak, mak iha momentu ne’eba ema julga ita katak, Universidade da Paz iha ona ninia kualidade.

Partisipa iha atividade refere, Magnifiku Reitór Universidade da Paz, Dr. Adolmando Soares Amaral, Lic. Eco.,MM. Dekanu Fakuldade Saúde Públika, Sr. Martinus Nahak Lino, AMKL, Lic. SP.M.AP. Dosente sira, inklui Estudante sira.