UNPAZ-ESTUDANTE 361 HUSI FAKULDADE CSH ABERTURA ESTAJIU PROFISIONAL

UNPAZ-ESTUDANTE 361 HUSI FAKULDADE CSH ABERTURA ESTÁJIU PROFISIONAL

Dili-Universidade da Paz (UNPAZ) liuhusi Fakuldade Siénsia Sosiasis Humaniora hala’o serimónia abertura ba estudante semester lima (5) hamutuk, atus tolu neen nulu resin ida (361) kompostu husi Deparetamentu haat hanesan Departamentu Relasaun Internasional, Politika Dezenvolvimentu, Estudu ba Paz, no Administrasaun Públika, ne’ebé atu hala’o estajiu profisional, iha Dili, Baucau no Liquisa, hahu 25 Abril 2022 to’o 25 Maiu 2022, iha Salaun José Kasimiru (23/04).

Primeiru Viçe Reitór Asuntu Akadémiku, Sr. Joaninho Xavier Hei, Lic. CSH.,M.Ed. ne’ebé reprezenta Magnifiku Reitór katak, ita bo’ot sira sei hakat ba servisu iha terenu hanesan vida profisional nian, ita sei koko aprende badaen iha terenu, atitude iha terenu nomós matenek sira iha terenu, ita bo’ot sira lori saida mak ita bo’ot sira hetan iha ne’e, koko atu fahe iha ne’eba nomós aprende mós husi sira.

“Tanba ne’e asuntu sira ne’ebé positivu tau hanesan referensia di’ak ida ba ita atu kontonua ba iha futuru, asuntu sira ne’ebé negativu labele hodi mai aplika tán ba iha futuru, pilar tolu presiza ita bo’ot sira koidadu, matenek, badaen no atitude, hato’o ba aprende mós husi ne’eba”,dehan Viçe Reitór.

Dekanu Fakuldade Siensia Sosiais Humaniora, Dr. Fernando Diaz Gusmão, AMd, M.AP. hateten, hanesan programa akadémiku ninian kada tinan Fakuldade sempre halo estájiu profisional, programa ida ne’e nia importansia depois de ita bo’ot sira hetan siénsia no téoria sira iha Fakuldade husi ita nia dosente sira, oinsa mak ita bo’ot sira bele hetan matenek husi pratika terenu.

Nia hatutan, tanba aban bairua ita akaba estudu iha nível universidade, ita ba iha kraik la’os ita atu aplika lolo’os de’it ita nia siénsia, maibe haree mós ba iha realidade katak, ita bele halo buat ruma tuir siénsia ne’ebé ita hetan, no ita bo’ot sira mós bele introdus saida mak ita bo’ot sira hetan durante hetan iha universidade.

“Aproveita didi’ak okaizaun estájiu profisional ida ne’e, para bele hariku liu tán ita bo’ot sira nia kapasidade, para iha kapasidade intelektual bele iha mós kapasidade pratika, tanba siénsia hanesan lapra ida hodi lano ita, oinsa mak ita atu la’o, tanba siénsia mai husi peskiza sira ne’ebé ema halo ba asuntu ruma, no ema dezenvolve sai téoria, depois ema estuda fila fali ba jerasaun sira tuir mai para hatene”,haktuir Dekanu.

Dekanu reforsa, estudante sira tenki hatudu komportamentu iha fatin estájiu, tanba komportamentu importante lo’os iha fatin estajiu nian, tanba ema sei sukat ita liuhusi ita nia hahalok sira ne’e, estudante sira aproveita ba esperiensia ne’ebé ita bo’ot sira hetan iha kraik, para imi bele riku liu ho imi nia kapasidade, nomós komportamentu para ema bele respeita ita hanesan ema indivu, aumesmu tempu hanesan instituisaun akadémiku ida iha ita nia rai.

Partisipa iha aberura estajiu profisional husi Fakuldade Siénsia Sosiasis Humaniora, Primeiru Viçe Reitór Asuntu Akadémiku, Sr. Joaninho Xavier Hei, Lic. CSH.,M.Ed. Dekanu Fakuldade Siensia Sosiais Humaniora, Dr. Fernando Diaz Gusmão, AMd, M.AP. ho estrutura kompostu husi Xefe Departamentu sira, Dosente, inklui Estudante estajiadu/a sira.