UNPAZ SELEBRA ANIVERSARIU BA DALA XIX

UNPAZ SELEBRA ANIVERSARIU BA DALA XIX

Dili-Universidade da Paz (UNPAZ) selebra aniversáriu ho tema "Reforma no Kualidade Meius Responsabilidade Kanalija Hahú ho Dies Natalis UNPAZ ba Dala XIX Iha 2023 ba Futuru Iha Timor-Leste", Iha Kampus Sentrál UNPAZ (09/03).

Liuhusi serimónia aniversáriu ne’e, Prezidente Konsellu Administrasaun Fundasaun Neon-Metin Ir. José Menezes Soares da Costa M. Food. Tech., iha nia diskursu hateten, orgullu ho gratidaun ba progressu no susesu ne'ebé universidade iha liuhusi kontribuisaun sira ne'ebé mak lahanesan.

“Orgullu ho sentimentu gratidaun ba progresu no susesu ne’ebé universidade da paz iha, susesu ida ne’e iha tanbá ita hotu nia kontribuisaun ne’ebé lahanesan tuir ida-idak nia kna’ar no kapasidade ita haksolok tanbá iha tinan sanulu resin-sia nia laran ita sei hamri’ik iha ne’e ho progresu ne’ebé mak di’ak tebes. Progresu sira ne’e iha tanbá kontribuisaun husi parte hotu ne’ebé mak eziste iha universidade da paz,” dehan José Menezes.

Iha fatin hanesan, Magnífiku Reitór Universidade da Paz Dr. Adolmando Soares Amaral, Lic. Eco, MM., mós salienta ezisténsia universidade ba tinan sanulu resin-sia iha duni nia progresu ho ida ne’e universidade da paz sei la depende ba ema ida maibé sei depende ba nia polítika ne’ebé mak iha mai ho lema reforma no kualidade.

“iha 2009 dúvida husi públiku ita fó resposta katak, universidade da paz sei la depende ba ema, maibe universidade depende ba nia polítika, tan ne’e ita mai ho lema Reforma no Kualidade, hodi armoniza estatutu universidade nian no hamosu regulamentu ba dezenvolvimentu rekursu umanu mata-dalan no organiza atividade sira tuir kalendáriu akadémiku ne’ebé mak iha. Agradese mós tanba ita organiza atividade lubuk ida hodi komemora aniversáriu universidade nian ba dala XIX, tanba progresu ne’ebe mak iha la’os estrutura, susesu no progresu ne’ebé ita iha hahú husi 2004-2023, maka ita tenki konsidera sosidade inan-aman sira, tanba laiha inan-aman no sosiedade, maka laiha investimentu iha UNPAZ, tanba ne’e UNPAZ mak povu, povu mak UNPAZ, ho ida ne’e povu tau hela esperánsa ba imi na’in hira ne’ebé mai iha ne’e, aproveita tempu ho di’ak hodi kontribui ba povu no rai ida ne’e,” dehan Reitór.

Reitór mós husu ba estudante sira hotu iha universidade da paz, ita bo’ot sira nia talentu ne’ebé mak iha halo de’it, ha’u apoiu 100%, tan ne’e lalika preokupa ba krítiku sira ne’ebe iha, tanba sira loron ka kalan ko’alia unpaz no iha ne’ebé de’it sempre temi UNPAZ, maibé ne’e di’ak ba ita, tanbá sira temi hela de’it ita.

Partisipa iha festa aniversáriu ne’e marka prezénsa husi parseiru servisu sira mak hanesan; Telkomcel, Mandiri, PNTL, Telemor, Diretor Exekutivu ANAAA.IP., CRS, ISC,CARE Internasionál, G7+ nomós Plan Internationál. Aliende ne’e, partisipa másimu mós estrutura Fundasaun Neon-Metin, estrutura universidade ne’ebé kompostu husi Vise-reitóres sira, dekanus fakuldade neen, xefe departamentus sira, Diretores sira, Dosentes, funsionárius, antigus-alunus, inan-aman sira nomós sivitas akadémikus sira hotu iha universidade da paz.