UNPAZ REALIZA SERIMONIA ENSERAMENTU PROGRAMA ESTAJIU SOSIAL NIVEL INSTITUISAUN TINAN AKADEMIKU 2023

UNPAZ REALIZA SERIMÓNIA ENSERAMENTU PROGRAMA ESTÁJIU SOSIAL NIVEL INSTITUISAUN TINAN AKADÉMIKU 2023

Dili-Universidade da Paz (UNPAZ) realiza serimónia enseramentu ba programa estájiu sosial nivel instituisaun tinan akadémiku 2023, ho tema "Aproveita Oportunidade Hodi Servi Instituisaun Ho Responsabilidade”,iha Kampus Sentral UNPAZ Dili (27/04).

Iha serimónia ne'e, Magnífiku Reitór, Dr. Adolmando Soares Amaral, Lic.Eco.,MM. hateten apresiasaun ne’ebé hato’o husi fundasaun ba reitór, prontu ita hato’o obrigadu wa'in, maibe la’os tanba reitór, ita iha estrutura universidade, fakuldade no programa estudu sira to’o iha unidade sira nomós ita nia estudante sira ne’ebé mai ho speritu ida ne’ebé mak di’ak tebes mak ita bo’ot sira, tanba ne’e la iha razaun atu dehan UNPAZ ema ida nian mesak, UNPAZ ita hotu nian nomós inan sira nian.

Nia hatutan, tuir planu tinan oin sei iha edifisiu foun ida tan ho andar tolu, no iha edifisiu nia laran hahú graduadu husi 2007 -2022 ate 2023 nia naran sei tau hotu, tanba ne'e agradese ba inan aman sira bele investe ona imi mai aprende siénsia no teknologia, ho ida ne'e imi tenki aproveita investimentu inana aman sira investe mai iha ne’e.

"Agradese ba inan aman sira ne'ebé tau fiar mai iha Universidade da paz, hodi haruka imi mai aprende siénsia no teknologia, tanba ne'e tenki Aproveita tempu sira ne'e ho di'ak atu aprende, para halo netik buat ruma ba sira, nune'e sira bele iha esperansa ne'ebé mak di'ak ba ita bo'ot sira. Tanba ne'e ha'u fiar katak buat ki'ik ne'ebé imi halo no imi nia alin sira tuir mai, ida ne'e sei sai istória, ho nune'e imi termina imi nia estudu iha ne'e, imi sei sai rekursu ida ne'ebé mak di'ak atu fó solusaun no alternativu ba povu no rai ida ne'e, katak buat ki'ik ne'ebé imi halo no imi sei halo buat bo'ot ba ema barak nia interese iha tempu sira tuir mai, bainhira imi tama iha sistema nia laran",tenik Reitór UNPAZ.

Iha fatin hanesan, Reprezenta Prezidente Konsellu Administrasaun Fundasaun Neon Metin, Ir. Hugu Carvalho, informa lolo’os ne’e programa ida ne’e universidade nian, maibe inisiu ita hamutuk hodi lideransa reitór ne’ebé mak lolo’os halo estájiu ne’e ba liur, maibe nia koko oinsa konsentra iha instituisaun nia laran, tanba modelu ne’ebé reitór halo, nu’udar modelu tradisaun universidade da paz nian.

“Maske nia lidera tinan tolu, ita haree mudansa iha universidade ne’e bo’ot tebes, maibe sura mós ho ita bo’ot sira hotu nia kontribuisaun, hanesan membru konsellu fundasaun, ha’u fiar katak buat ne’ebé mak imi halo ami labele sura no selu, maibe universidade ida ne’e sai hanesan ita hotu nian, tanba ne’e ita sei la ko’alia de’it, maibe ita sei hatudu ita nia servisu lor-loron”,tenik Nia.

Sorin seluk, Prezidente Komisaun Organizadóra ba Programa Estájiu Sosial Tinan Akadémiku 2023, Sr. Joaninho Xavier Hei, Lis.CSH.,M.Ed, nu’udar mós Vise Reitór Asuntu Akadémiku, haktuir estájiu sosial ba nivel instituisaun total estájiadu/a hamutuk 1.424 ne’ebé fahe ba grupu 32 hodi koloka ba iha kampus sentral no kampus B Liquisa.

Nia esplika atividade estájiu sosial hanesan atividade programa rutina ne'ebé tau iha Kurikulum, kada tinan estudante finalista sira molok rema sira nia estudu, presiza ho estájiu ba iha komunidade sira nia le'et hodi hatene servisu ne'ebé mak akontese iha komunidade.

"Agradese no orgullu ba membru komisaun sira hotu ne'ebé dedika ona tempu, nomós ba Dosente Funsionáriu sira hotu ne'ebé apoiu ona servisu Estudante estájiadua sira, tanba ne'e agradese ba estájiadu sira hotu nia kontribuisaun hodi aprende iha terenu",dehan Prezidente Komisaun.

Partisipa iha serimónia enseramentu Programa Estajiu Sosiais ne'e, Magnífiku Reitór, Dr. Adolmando Soares Amaral, Lic.Eco.,MM. Reprezenta Prezidente Konsellu Administrasaun Fundasaun Neon Metin, Ir. Hugu Carvalho. Amu Kapelaun Manuel Pinto, Estrutura Senadu Universidade ne'ebé kompostu husi Vise Reitores Dekanu sira, Pro-Reitor sira, Xefe Departamentu, Diretor/a Unidade sira, Funsionariu Dosentes, Inklui Sivitas Akadémiku sira hotu iha Universidade da Paz.