![UNPAZ REALIZA ORIENTASAUN AKADEMIKU BA ESTUDANTE FOUN (3.448) ANU LETIVU 2023](https://unpaz.tl/asset/foto_berita/023.jpg)
UNPAZ REALIZA ORIENTASAUN AKADÉMIKU BA ESTUDANTE FOUN (3.448) ANU LETIVU 2023
Dili-Universidade da Paz (UNPAZ) realiza orientasaun ba estudante akadémiku rihun tolu, atus haat, haat nulu, resin ualu (3.448) anu letivu 2022-2023, ho lema Liuhusi Atribuisaun Siensia Edukasaun Sei Halo Mudansa Ba Seitór Dezenvolvimentu Iha Timor-Leste, iha Salaun Jose Kasimiru (02/03).
Magnifiku Reitór, Universidade da Paz, Dr. Adolmando Soares Amaral, Lic.Eco.,MM, hateten familia bo’ot Universidade da Paz nomós Familia bo’ot Funadasaun Neon Metin, agradese no obrigadu wa’in ba inan aman nomós sosiedade ba fiar tomak ne’ebé mak fó mai Fundasaun nomós Universidade da Paz, iha tinan ida ne’e, ne’ebé mak haruka ita bó’ot sira asesu mai aprende siensia no teknologia iha Universidade da Paz, ho total estudante 3.448, ne’ebé mak ohin ita hahu orientasaun akadémiku.
“Orientasaun akadémiku iha Universidade da Paz, iha istoria orientasaun hotu-hotu iha Ensinu Superior iha Timor-Leste, Pre-Sekundaria nomós sekundaria, maibe orientasaun akadémiku ne’e, Universidade da Paz hahu kedas iha 2020, katak lahalo ona kandidatu estudante sira, atu sai hanesan ema bulak, maibe atu prepara sira lori sira ba koñese biblioteka, laboratorium no prosesu aprendisaegen, ida ne’e mak UNPAZ aplika iha orientasaun akadémiku”,tenik Reitór.
Nia hatutan, ita hanoin atu hamosu orientasaun akadémiku, tanba ita bo’ot sira mak alternativu ba futuru no rai ida ne’e, tanba ne’e ita bo’ot sira mai tuir orientsaun akadémiku, atu rona barak ba programa ne’ebé sei ko’alia durante semana ida, hahu husi Prezidente da Públika, Líder polítiku, no Líder Nasional sira, hotu-hotu sei mai ko’alia ba ita bo’ot sira, tanba ne’e ita bo’ot sira rona no aproveita depois organiza ita bo’ot sira nia an, iha tinan lima ka tinan sanulu mai fali la’os sira mak mai, maibe ita bo’ot sira mak ko’alia fali ba ita bo’ot nia alin sira.
“Tanba ne’e mak ita buka atu fó kapasitasaun ba ita bo’ot sira, buka atu fahe informsaun nasaun nian, governu no sosiedade nian, nomós kampus nian ba ita bo’ot sira, liuhusi atividade orientasaun akadémiku ida ne’e, ho ida ne’e mak ita bele prepara rekursu humanu ida ne’ebé ho kualidade hodi fó solusaun ba povu no rai ida ne’e”,dehan Reitór UNPAZ.
Reitór Salienta, agora ita bo’ot sira hola parte hanesan familia bo’ot universidade da Paz, maka ita hotu iha responsabilidade moral, saida mak ita rona iha fatin ida ne’e, saida mak di’ak ba povu no rai ida ne’e, ita tenki lori ba haklaken fila fali ba sira ne’ebé mak seidauk rona, ida ne’e mak ita tenki halo agora no ba futuru, ho ida ne’e mak ita bele kontribui no halo asaun mais pozitivu ba ita nia nasaun no ba povu.
Agora Universidade da Paz sura ona ho imi, imi la’os kanditatu estudante foun ba Universidade da Paz, maibe ita sai familia bo’ot Universidfade da Paz, tanba ne’e ita hotu-hotu iha respnsabilidade moral, atu tane naran ida Universidade da Paz ne’e, as no ita bele halo buat ruma di’ak ba povu no rai ida ne’e, liuhusi asaun sira ne’ebé ita halo, tanba ita aprende ona siensia no teknologia, iha rai ida ne’e labele ema ida mesak, ita hotu tenki hamutuk sai forsa ida maka ita bele halo buat ruma ba povu no rai ida ne’e, Reitór hakotu.
Iha fatin hanesan, Prezidente Konsellu Administrasaun Fundasaun Neon Metin, Eng. Jose Menezes, Soares da Costa, MfoodTech, apresia tebes ba kandidatu estudante anu letivu 2023, ne’ebé hili primeiru opsaun hodi mai aprende iha universidade da Paz, uluk UNPAZ hanesan segundu opsaun ka terseiru opsaun, maibe agora UNPAZ sai hansan primeiru opsaun ba estudante sira.
Entretantu partisipa iha abertura orientasaun akadémiku 2023, Senadu Universidade ne’ebé kompostu husi, Magnifiku Reitór, Universidade da Paz, Dr. Adolmando Soares Amaral, Lic.Eco.,MM. Prezidente Konsellu Administrasaun Fundasaun Neon Metin, Eng. Jose Menezes, Soares da Costa, MfoodTech, ho Estrtura Fundasaun, Vise Reitores sira, Dekanu Fakuldade 6 ho Vise Dekanu sira, Xefe Departamentu sira, Diretor/a Unidade sira, Dosentes, Funsionariu, Sivitas Akadémiku hotu iha Universidade da Paz.