UNPAZ REALIZA ONA EZAME KLARAN BA NIA ESTUDANTE SIRA

UNPAZ REALIZA ONA EZAME KLARAN BA NIA ESTUDANTE SIRA

Dili-Uniuversidade da Paz (UNPAZ) realiza ona ezame klaran ba nia estudante semester, II, IV,VI, ba tinan akadémiku 2022, iha kampus UNPAZ (19/10).

Ekipa monitorizasaun, Sra. Helenora da Costa Fatima, Lic. Dir. hateten, ami husi Unidade Administrasaun Finansas nomós Unidade Administrasaun Akadémiku Asuntu Estudantil (UA-AAE), hala’o monitorizasaun ba estudante sira iha aula, ligadu ho sira nia propinas, tanba estudante sira molok hakat ba ezame tenki kompleta ona propinas 50% hafoin bele tuir ezame.

“Estudante sira ne’ebé maka seidauk kompleta propinas 50%, seidauk bele tuir ezame, sei halo komfirmasaun ho sira nia fakuldade, atu nune’e sira bele tuir fali ezame, tanba ami halo monitorizasaun ba iha ezame ne’e, akompaña mós husi segundu vise dekanu fakuldade nian”,tenik Nia.

Estudante Nazarela da Costa Maya, husi Fakuldade Saúde Públika, Departamentu Administrasaun Jestaun Polítika Saúde, semester II, hateten ami ne’ebé tuir ezame kompleta ona propinas 50%, ba sira ne’ebé seidauk kompleta sira sei halo komfirmasaun ho fakuldade, nune’e sira bele tuir fali ezame.

“Orgullu tebes ho ezame ida ohin, tanba materia ne’ebé durante ami aprende husi dosente sira iha aula, mak ohin fó sai fali iha ezame ida ne’e”,dehan Estudante Nazarela.

Sorin seluk, Estudante Marito da Costa, husi Fakuldade Siénsia Sosiais Humana (CSH) departamentu Administrasaun Públika, semester II, hatutan, ohin ami ezame ba semester ida ne’e, tuir ha’u nia hatene, molok haktat ba ezame ida ne’e, tenki hasoru malu ho dosente iha aula dala 7 molok haktak ba ezame, nomós iha seluk mak estudante sira tenki kompleta propinas 50% hafoin bele tuir ezame.