UNPAZ REALIZA GRADUSAUN BA PROGRAMA MAESTRADU NO LISENSIATURA BA FAZE DAHULUK

UNPAZ REALIZA GRADUSAUN BA PROGRAMA MAESTRADU NO LISENSIATURA BA FAZE DAHULUK

Dili-Universidade da Paz (UNPAZ) realiza serimónia Graduasaun ba programa lisensiatura ba dala XVI no programa mestradu ba dala VI tinan akadémiku 2022 ho tema “Hasoru Globalizasaun UNiversidade da Paz, Ami Mai Ho Hnaoin Kreativu No Inovativu Hodi Konstrui Ba Inovasaun IhaTimor-Leste, iha Salaun José Casimiro (19/12).

Liuhusi graduasaun ne’e, Magnífiku Reitór Universidade da Paz, Dr. Adolmando Soares Amaral, Lic.Eco, MM, agradese ba inan-aman ne’ebé fó ona konfiánsa ba universidade da paz hodi haruka ona oan sira hala’o estudu iha universidade ida ne’e, ohin sira bele finaliza ona sira-nia estudu. No iha nia parte enkoraja graduadu sira atu kontribui ba dezenvolvimentu liuhusi siénsia no teknolójia ne’ebé mak apriende ona iha universidade durante tinan haat nia laran.

“La’os gradua ona atu ba buka servisu, maibé gradua ona, oinsá kontribui ba povu no rai ida ne’e, liuliu atu asegura polítika estadu nian, siénsia transforma ema hotu-hotu nia mentalidade, para ema agrikultór sira, oinsá sira bele fila-fali ba to’os no natar, ema ekonómia sira bele hasa’e produsaun iha rai-laran bele hala’o atividade di’ak ho indústria sira no ema sira polítika bele halo polítiku atu nune’e ema bele rona no bele halo tuir,”dehan Reitór.

Sorin seluk, Prezidente Konsellu Administrasaun Fundasaun Neon-Metin, Eng. José Menezes, Tec.Food husu ba graduadu sira, susesu ne’ebé imi hetan, la’os imi nian mesak de’it, maibé susesu ne’ebé iha mai husi ema lubuk nia sakrifísiu, liuliu inan-aman, familia sira nomós imi nia parseiru/a, tán ne’e, susesu ne’ebé imi hetan tenki tau konsiderasaun ba ema lubuk ne’ebé eziste iha imi nia prosessu sakrífisiu to’o ohin loron.

Reprezentante inan-aman, Sr. Gil da Costa Monteiro, hato’o mensazem ba graduadu sira katak, laiha ema ida mak labele, ohin imi mai sosa katana iha universidade da paz ho katana ne’ebé kro’at, maibé husu imi fila ho hatene kadi, atu nune’e, kro’at nafatin tanbá ne’e, responsabilidade. Graduasaun ne’ebé ohin imi simu ne’e, la’os ninin no rohan ba imi, maibé ninia ninin no rohan iha kunadu imi laiha ona iha rai ida ne’e, labele haluhan inan-aman, tanbá sira mesak mak selu imi-nia eskola, maibé ikus ita-bo’ot sira sei serví ba povu no nasaun.

Aliende ne’e, Eng. Jeremias da Costa Rodrigues, ne’ebé reprezentante graduadu hateten, ohin ami graduadu husi fakuldade tolu ne’ebé ohin simu ona ami nia kualifikasaun akadémika ida ne’ebé di’ak tebes, hodi oferese mai ami hanesan responsabilidade ida ba ami nia aan, hodi hatán ba problema sosiál sira ne’ebé sosiedade sira infrenta iha rai doben timor-leste. Agradesimentu ba inan-aman ne’ebé durante ne’e fó ona konfiánsa mai ami investe ona buat hotu mai ami nia le’et atu bele apoiu ami nia estudu to’o mai susesu iha loron ida ne’e. agradese mós ba universidade da paz ne’ebé fó ona espasu liuhusi líderansa magnífiku reitór universidade da paz nian, nune’e durante ami nia prosesu tomak bele la’o ho di’ak, ohin ami bele termina ami nia estudu ho títulu akadémiku ne’ebé responsabilidade bo’ot hodi serví ba sosiedade ne’ebé hein hela ami iha future.

Gradusaun iha faze dahuluk ne’e husi fakuldade tolu (3); fakuldade Agrikola graduadus hamutuk (60), fakuldade ciências Sociais Humanas, graduadus hamutuk (188) no fakuldade ekonómia graduadus, hamutuk (265), nune’e programa mestradu graduadus hamutuk (13), totál graduadus ba faze dahuluk hamutuk (589) ne’ebé kompostu husi programa lisensiatura no programa mestradu.

Entretantu Iha serimónia graduasaun faze dahuluk ne’e, palestra siéntifiku husi Dr. Xisto Martins Ph.D, hetan partisipa másimu husi Senadu Universidade da paz ne’ebé kompostu husi dekanu fakuldade 6, vise-reitores sira, xefe-departamentus, pro-reitores, diretór/a unidades sira, dosentes, Inan-Aman no familia sira hotu, Membru PNTL, destintus konvidadus inklui sívitas akadémika universidade da paz.