UNPAZ REALIZA EZAME BA KANDIDATU ESTUDANTE FOUN 2.145 BA FAZE DAHULUK

UNPAZ REALIZA EZAME BA KANDIDATU ESTUDANTE FOUN 2.145 BA FAZE DAHULUK

Dili-Universidade da Paz (UNPAZ) realiza ezame ba kandidatu estudante foun tinan akadémiku 2023 ho totál estudante rihun rua, atus ida haat nulu resin lima (2.145) ba faze dahuluk nian, iha Kampus sentrál UNPAZ Dili (25/01).

Liuhusi ezame teste ba estudante foun ne’e, Magnifiku reitór Universidade da Paz Dr.Adolmando Soares Amaral Lic.Eco, MM hato’o parabens ba estudante, públiku no inan-aman sira ne’ebé fo fiar ona ba Unpaz hodi haruka ona oan sira mai hala’o estudu iha universidade ho estatutu hanesan kandidatu foun ba loron ohin nian, nune’e bainrua sei halo evaluasaun ba sira nia teste hodi sira sai ona familia bo’ot ba universidade tinan akademiku 2023 ba oin.

“Familia bo’ot unversidade da paz, ita ohin fo ezame teste ba estudante foun 2023 faze dahuluk ne’ebé ita hahú loke rejistu ba estudante foun ne’ebé akomoda 2.145, total estudante hirak ne’e mak ohin tuir ona teste . Husi númeru estudante foun ba faze dahuluk ne’ebé iha hatudu katak UNPAZ ne’e la’os ona alternativu maibé sai ona opsaun ba estudante no públiku, nune’e Ita fiar katak númeru estudantes 2.145 husi faze dahuluk ne’e, sira hakarak deside duni hodi hamutuk ita iha Unpaz liuhusi programa estudu 20 nível lisensiatura iha fakuldade neen (6) depois ba programa maestradu hitu (7) nomós ita lansa tan programa Doutoramentu rua maka Administrasaun Públika no Siénsia de Direitu”,dehan Reitor.

Aleinde ne’e Alberto Aleixo nu’udar estudante kandidatu foun iha departamentu direitu civil ne’e esplika, hanesan sidadaun ne’ebé mak di’ak ho kondisaun ne’ebé defisiente ka (ema ho konsidaun espesiál) ha’u senti orgullu tanba universidade ida ne’e bele proivida bele loke ba públiku, nune’e ha’u mós hetan oportunidade hodi bele asesu mai iha unpaz tanba ne’e, pesoal hanesan ema defisiente agradese tebes ba universidade da paz nu’udar instituisaun privadu ida ne’ebé bele simu ha’u hodi kontinua ha’u nia estudu.

Iha sorin seluk Deliana Bianco Posto nu’udar estudante bolseira kandidatu foun salienta, bolseiru ne’ebé ha’u hetan iha universidade ne’e hanesan grasa no kbi’it ida mai ha’u no ba ha’u nia familia, tanba hala’o estudu tinan 4 iha universidade ne’e la’os buat ki’ik tan ne’e inan-aman no familia apresia ba oportunidade ne’ebé maka iha, hodi ha’u bele kontinua ha’u nia estudu iha programa Empreendedorizmu, husi oportunidade ne’e ha’u sei aproveita didi’ak hodi hala’o ha’u nia estudu ida ne’e ho susesu iha universidade ne’e atu nune’e buat ne’ebé ha’u apriende bele tau prátika iha futuru.

Entretantu estudante foun ba faze dahuluk tinan akademiku 2023 ne’ebé tuir ezame teste iha loron ohin ho total 2.145. Total Estudantes hirak ne’e akumula husi fakuldade neen ho nia deprtamentu 20 mak hanesan; Fakuldade Ekonomia : Departamentu Jestaun 103, Kontabilidade 102, Bankária 178 no Empreendedorizmu 9. Fakuldade Direitu : Departamentu Siénsia de Direitu 257. Fakuldade CSH : Departamentu Relasaun Internasionál 159, Politika Dezenvolvimentu 17, Estudu ba Paz 12 no Administasaun Públika 231. Fakuldade Saúde Públika : Departamentu Jestaun Adm.Politika da Saúde 107, Siénsia Nutrisaun 222, Siénsia Saúde Ambientál 73, Saúde Reprodutiva 62, Siénsia Epidemolojia 101, Biostátistika no Sistema Informasaun Saúde 18. Fakuldade Enjenária: Departamentu arkitetura 69, Enjenária Indústria 22, no Konsturusaun Sivil 209. Fakukdade Tek.Agrikola; Departametu Jestaun ALimentar 8 no Koonservasaun Rekursu Naturais 26. Bolsu Estudu Empreendedorizmu 106 no Estudu ba Paz 54, Total Estudantes maka 2.145, ne’ebé mai husi inskrisaun faze dahuluk nian. Tuir kalendáriu sei iha tan inskrisaun ba faze segundu no faze terseiru.