UNPAZ- PRO-REITOR DRH HO KORDENADOR UNPAZ RAMU COVALIMA KOMVOKA REUNIAUN HO PROFESSOR PARTE TEMPU SI

UNPAZ- PRO-REITOR DRH HO KORDENADOR UNPAZ RAMU COVALIMA KOMVOKA REUNIAUN HO PROFESSOR PARTE TEMPU SIRA IHA COVALIMA

Dili-Universidade da Paz (UNPAZ) nia Pro Reitor Dezenvolvimentu Rekursu Humanu, Sr. Carmo Antonio Pinto Baptista, S.Sos. Msi. ho Kordenador Jeral UNPAZ Ramu Covalima, Sr. Silvester Ferreira, Lic. Eco.,MM. Komvoka reuniaun ho Professor parte tempu sira, iha Covalima hodi apoiu materia bazika/MKDU iha tinan 2022 UNPAZ Ramu Covalima, (13/04).

Pro Reitor Dezenvolvimentu Rekursu Humanu, Sr. Carmo Antonio Pinto Baptista, S.Sos. Msi. hateten, reuniaun ida ohin kontinua ho ajenda ne’ebé Magnifiku Reitór, halo abertura iha kampuz sanak UNPAZ Covalima.

Nia hatutan, materia sira ne’ebé tama iha MKDU, hetan orientasaun husi Magnifu Reitór, ita lori dosente lokal sira ne’ebé mak agora hanorin hela eskola sekundaria sira, atu apoiu hanorin estudante sira, kona-bá materia bazika/MKDU bá semester iha tinan ida ne’e.

“Ho sentidu katak, saida mak akontese iha kampuz sentral, sei akontese mós iha kampuz sanak sira, tanba ne’e dosente lokal sira mai la’os atu buka osan, maibe sira mai atu apoiu UNPAZ Ramu Covalima, tenki hamrik hodi lori Covalima bá futuru”,dehan Nia.

Kordenador Jeral UNPAZ Ramu Covalima, Sr. Silvester Ferreira, Lic. Eco.,MM. Reforsa, agradese bá dosente parte tempu ne’ebé ita hamutuk iha fatin ida ne’e, ita nia objetivu ne’e ida de’it, ita hakarak mudansa, ita tenki la’o hamutuk ho UNPAZ.

“Ho moto ida katak, imi la hakbesik bá UNPAZ, UNPAZ mai hakbesik a’an bá imi, tamba ne’e ema Covalima oan, tenki na’in bá Universidade da Paz, esforsu ne’ebé ami halo, la mai tanba ami, mai tanba ema Covalima”,haktuir Kordenador.

Sorin seluk, Professor Ensinu Sekundaria Jeral, Suai, Sr. Paulo Alsino Cardoso, nu’udar Covalima oan, ami orgullu no agradese bá ita bo’ot sira nia domin bá Covalima oan bele asesu bá seitor edukasaun, importante liu mak ita nia kolaborasaun.

Partisipa iha reuniaun ne’e, Pro Reitor Dezenvolvimentu Rekursu Humanu, Sr. Carmo Antonio Pinto Baptista, S.Sos. Msi. Kordenador Jeral UNPAZ Ramu Covalima, Sr. Silvester Ferreira, Lic. Eco.,MM. Professor Ensinu Sekundaria Jeral, Suai, Sr. Paulo Alsino Cardoso, ho Professor sira seluk, Estrutura Universidade, Dosente sira, inklui Estudante sira hotu iha Kampuz Ramu Covalima.