UNPAZ HUSU MISA AGRADESIMENTU MOLOK HAKAT BA GRADUASAUN

UNPAZ HUSU MISA AGRADESIMENTU MOLOK HAKAT BA GRADUASAUN

Dili-Universidade da Paz (UNPAZ)Hamutuk Ho Graduadu /A Sira Hotu Selebra Misa Hodi Hasa’e Agradesimentu Ba Aman Maromak Ba Korpus Dosente Sira Nomós Finalista Sira Hotu Ba Susesu Ida Ne’e, Selebrasaun Misa Santa Ida Ne’e Nu’udar Oportunidade Ne’ebé Nakonu Ho Grasa, Tanba Liuhusi Esforsu An Iha Loron Manas No Malrin Udan No Anin Kolen No Dala Ruma Moras Hamlaha No Hamrok No Difikuldade Ka Dezafiu Oi-Oin Ita Bo’ot Sira Ho Aten brani Vontade Pasensia No Fiar An Hodi Termina Estudu, iha Salaun Jose Casimiro UNPAZ (18/12).

Iha misa agradesimentu ne’e, Amu Selebrante Pe. Juvito, iha Omilia hateten, ema matenek na’in ita labele loko an, maibe haraik an nafatin no moris ho komportamentu ne’ebé mak di’ak, tanba loko an no komportamentu ne’ebé mak la di’ak buat hotu matenek ne’ebé ita iha sei la iha benefisiu ka saugati, ne’ebé se mak hafalun an ho hahalok di’ak ho komportamentu di’ak nia mak na’in ba moris ne’e no nia mak na’in ba moris haksolok.

Magnifiku Reitór Universidade da Páz Dr. Adolmando Soares Amaral, Lic,Eco. MM. agradese ba Amu selebrante na’in rua, Amu Manuel Pinto no Amu Juvito do Rego, ne’ebé dirije ona misa santa ida ne’e, agradese mós ba inan aman sira hotu ne’ebé mak partisipa iha misa ida ne’e.

“Hamutuk ho ita bo’ot sira hotu, ita sai forsa ida, ha’u fiar katak Universidade da Paz iha 2023 sei la’o diak liu tán hanesan agora, tanba ne’e parabens ba inan aman nomós graduadu/a sira, ne’ebé aban sei tuir serimónia solene graduasaun nian”,dehan Reitór UNPAZ.

Nia hatutan, Siensia no teknologia ne’ebé ita bo’ot sira aprende tenki kuda iha rai, tenki kuda iha ema, atu nune’e, dezenvolvimentu ba ita nia nasaun ita bele sente no bele fó efeitu ba ita nia povu iha teritoriu ba moris di’ak.

Entretantu misa agradesimentu ne’e, diriji husi Amu Selebrante Pe. Manuel Pinto ho Amu Juvito do Rego. Partisipa masimu husi senadu universidade ne’ebé kompostu husi Vise Reiteres sira, Dekanu Fakuldade 6, Xefe Departamentu sira, Pro-reitores sira, Diretor/a Unidade sira, Dosente, Funsionariu, Inan Aman, graduadu/a sira, inklui sivitas akadémiku Universidade da Paz.