UNPAZ HO UNIVERSITAS KRISTEN SATYA WACANA ASINA NOTA KOOPERASAUN

UNPAZ HO UNIVERSITAS KRISTEN SATYA WACANA ASINA NOTA KOOPERASAUN

Dili-Universidadeda Paz (UNPAZ) hala’o serimónia asina Memorandum of Undertanding (MoU) ho UNIVERSITAS KRISTEN SATYA WACANA-Indonesia, atu servisu hamutuk iha programa estudu sira ne’ebé mak di’ak liu iha futuru, iha restaurante Legendariu Largo Lesidere (20/10) horseik.

Magnifiku Reitór, Universidade da Paz, Dr. Adolmando Soares Amaral, Lic. Eco.,MM. hateten, ita nafatrin halo kooperasaun ho universidade sira iha rai liur, badala ida ne’e, ita kontinua hadia fila fali memorandu ida ne’e ho wacana, tanba iha 2010 ita halo ona asina ho sira, maibe agora ita kontinua asina tán fali, tanba iha programa foun barak ne’ebé mak ita atu hala’o servisu hamutuk, agora sira iha programa estudu neen nulu (60), ita foin mak vinte kuatru (24), depois sira nia programa estudu sira ne’e to’o ona iha nivel doutoramentu.

“Ita hakarak halo nafatin kooperasaun ho sira, para ita nia dosente sira bele kontinua iha nivel mestradu no doutoramentu iha Universitas Kristen Satya Wacana, dosente husi ne’eba mós bele mai ajuda hanorin programa mestradu iha ne’e, ita nia estudante nomós dosente sira mós bele ba aprende iha ne’eba, no sira nian mós bele mai iha ne’e, ita mós sei halo peskiza hamutuk, no halo públikasaun jornal internasional, ho ida ne’e, mak ita asina tán nota kooperasaun ne’e”dehan Reitór UNPAZ.

Nia hatutan, Universitas Kristen Satya Wacana, ho Universidade da Paz, la’os buat foun, ita kleur ona desde 2010, ita halo ona kooperasaun ho sira, no dosente barak husi UNPAZ, alumi husi Universitas Kristen Satya Wacana, inklui ha’u rasik mós alumi husi Universidade ida ne’e, tanba ne’e, mak ita nafatin ho sira, tanba Universitas Kristen Satya Wacana nia historia ho Timor-Leste ne’e uníku tebes, iha momentu ne’ebé ita esforsu atu buka independensia, dosente sira iha Satya Wacana maka apoiu ita iha prosesu Timor-Leste ba ukun an.

Tanba ne’e mak lasala Universidade da Paz, halo kooperasaun ho sira, tanba sira apoiu desde uluk kedas, tanba ne’e iha nota koperasaun ne’ebé ita asina hamutuk, sira mós aproveita ita iha buat balu no ita mós aproveita sira iha buat balu, ba objetivu ida ne’ebé mak di’ak. Reitór hakotu.

Vice Reitór Asuntu Kooperasaun Interna, Universitas Kristen Satya Wacana-Indonesia,

Sra. Neny Isharyanti, Ph.D. salienta, prezensa UKSW iha UNPAZ, atu ko’alia liu kona-ba servisu hamutuk entre UNPAZ ho Universitas Kristen Satya Wacana Indonesia, (UKSW), kontenti tebes ami nia prejensa iha UNPAZ durante loron hirak ne’e, tanba Sr. Reitor raisk mós alumi husi Satya Wacana, no dosente barak mós alumi husi ne’eba hotu.

“Iha nota de entendimetu nia laran ne’e ko’alia mós buat barak, iha futuru dosente husi UNPAZ bele ba UKSW, dosente husi UKSW mós bele mai iha UNPAZ, inklui mós estudante sira, Universidade da Paz, ho Universytas Kriten Satya Wacana la’os foin maka atu halo kooperasaun, maibe desde uluk kedan UNPAZ ho UKSW halo tia ona kooperasaun, neduni ohin kalan ida ne’e, ita mai han kalan hamutuk hodi asina nota de entendimentu entre UNPAZ Timor Leste ho UKSW Indonesia”, tenik Neny.

Partisipa iha serimónia ne’e, Magnifiku Reitór, Universidade da Paz, Dr. Adolmando Soares Amaral, Lic. Eco.,MM. Vice Reitór Asuntu Kooperasaun Interna, Universitas Kristen Satya Wacana-Indonesia, Sra. Neny Isharyanti, Ph.D. ho estrutura, Vise Reitór sira, Dekanu nomós Vise Dekanu, inklui Estrutura tomak iha Universidade da Paz.