UNPAZ HO KOICA ASINA AKORDU HODI SERVISU HAMUTUK

UNPAZ HO KOICA ASINA AKORDU HODI SERVISU HAMUTUK

Dili-Universidade da Paz (UNPAZ) nia Magnifiku Reitór, Dr. Adolmando Soares Amaral, Lic. Eco.,MM. ohin asina akordu ho Governu Korea, liuhusi Manager Project Koica Prof. Kim Jungho, asina akordu ho objetivu levantamentu dadus ba venefisiariu sira kona-ba produtu horti kultura nian, iha edifisiu Ministeriu Finansas (10/03).

Magnifiku Reitór Universidade da Paz, Dr. Adolmando Soares Amaral, Lic. Eco.,MM. hateten ohin ita asina akordu ho governu Korea liuhusi Koica liu-liu kona-ba levantamentu dadus kona-ba venefisiariu sira nia projetu horti kultura, oinsa sira nia produsaun no oinsa atu ba merkadu, depois ida ne’e bele hadia sira nia ekonomia familia ka lae, tanba ne’e mak ohin ita mai asina akordu.

“Projetu ne’e antes ne’e sira la’o iha Universidade hotu iha dili laran hodi halo diskusaun, no ikus mai sira desidi UNPAZ mak bele ba halo survei refere”,dehan Reitór Unpaz.

Aliende ne’e, Manager Project, Prof. Kim Jungho, hatutan projetu sei hahú iha tinan ida ne’e to’o iha 2025, hodi hasa’e ninia progresu, sira buka duni instituisaun ida ne’ebé mak bele duni atu analiza no halo survei hodi hatene kona-ba horti kultura nian.

“Ami hili UNPAZ hanesan Univerrsidade ida ne’ebé di’ak iha Timor-Leste, tanba ne’e mak ami halo akordu ho UNPAZ hodi halo survei ida ne’e, tanba ne’e UNPAZ sei servisu hamutuk ho governu Korea atu elebora di’ak liu tán programa sira kona-ba survei ne’e”,haktuir, Manager Project, Prof. Kim Jungho.

Partisipa iha asina akordu ne’e, Magnifiku Reitór, Universidade da Paz, Dr. Adolmando Soares Amaral, Lic. Eco.,MM. ho Estrutura tomak, Ministru Agrikultura Peskas, Manager Project, Prof. Kim Jungho, ho ekipa. Autoridade lokal sira, Inklui Komvidadus hotu.