![UNPAZ HO INSTITUT TEKNOLOGI SEPULUH NOPEMBER SURABAYA DESKUTE NOTA KOOPERASAUN](https://unpaz.tl/asset/foto_berita/68.jpg)
UNPAZ HO INSTITUT TEKNOLOGI SEPULUH NOPEMBER SURABAYA DESKUTE NOTA KOOPERASAUN
Dili-Universidade da Paz (UNPAZ) ohin hetan vizita husi ekipa Institut Teknologi Sepuluh Nopember Surabaya, hodi deskute hamutuk ho estrutura UNPAZ kona-ba nota kooperasaun ne’ebé antes ne’e hala’o ona, desde tinan hira liuba, maibe ohin iha diskusaun ne’e atu hadia fila fali hodi implementa programa sira iha futuru oin mai, iha Reitór nia kna’ar fatin (06/12).
Dekanu Fakuldade Enjeñaria, Sr. José Manuel Maniquin, AP.,Lic.Eng.,M.Eng. hatete, ekipa husi ITS mai iha UNPAZ, hodi haree kona-ba ita nia akordu ne’ebé, iha momentu Prof. Lucas nia tempu ita asina MoU ho sira, kona-ba kapasitasasun rekursu humanu, nomós estudante sira halo estudu komparativu inklui peskiza hamutuk.
Nia hatutan, ita ko’alia kona-ba akodu, iha nivel universidade, ita dehan memorandum of understand (MoU) nivel fakuldade asuntu tekniku, bai-bain ita bolu (MoA), maibe iha fakuldade enjeñaria ita propoin katak, kapasitasaun ba dosente funsionariu inklui estudante ativu sira mós tenki iha, seluk mak peskiza hamutuk liuliu kona-ba infraestrutura, nune’e bele hapar ho fakuldade enjeñaria.
“Ita atu implementa programa sira ne’e tenki iha akordu ida, tanba ne’e akodu ne’e ita sei hadia tuir situasaun loron ohin nomós situasaun ne’ebé iha tempu sira tuir mai, liga mós ho dezenvolvimentu teknologia, tanba ne’e, ita akordu tiha mak foin implementa programa sira ne’e ba iha futuru”,dehan Dekanu Fakuldade Enjeñaria, Sr. José.
Hanesan universidade tenki nakloke an hodi habelar informasaun ba universidade seluk la’os iha rai laran de’it, maibe ba mós universidade sira iha rai liur, Nia reforsa.
Partisipa iha diskusaun ne’e, Vise Reitór Asuntu Akademiku, Sr. Joaninho Xavier Hei, Lic. CSH. M. Ed. ho estrutura husi Fakuldade Enjeñaria, Gabinete Reitoradu, inklui ekipa Institut Teknologi Sepuluh Nopember Surabaya.