![UNPAZ HO ESTATISTIKA ASINA NOTA ENTENDIMENTU](https://unpaz.tl/asset/foto_berita/278402229_710134957105126_259171210219148883_n.jpg)
UNPAZ HO ESTATISTIKA ASINA NOTA ENTENDIMENTU
Dili-Universidade da Paz (UNPAZ) hala’o serimónia asina nota entendimentu entre Ministériu Finansas Diresaun Jeral de Estatistika ho UNPAZ Fakuldade Ekonomia, iha Aula Prof. Dr. Lucas da Costa, (12/04).
Magnifiku Reitór, Universidade da Paz, Dr. Adolmando Soares Amaral, Lic. Eco.,MM. hateten, UNPAZ ho Estatistika halo ona parseiru antes ona, hodi apoiu atividade lubuk ida, maibe ohin ne’e ita atu formaliza de’it liuhuis asina nota entendimentu, ne’ebé durante ne’e ita sai ona parseiru.
Nia hatutan, ohin ita asina nota entendimentu para ita bele sai parseria ida ne’ebé di’ak, papel UNPAZ nian, mak ami bele kontribui buat balu ne’ebé bele aijuda governu halo netik buat ruma di’ak bá rai ida ne’e nomós povu ida ne’e.
“Ita labele hatudu de’it liman bá governu no husu bá governu, depois ita la koi kontribui, ne’e ha’u hanoin ladun lo’os, iha rai ida ne’e labele ema ida mesak, tenki ita hotu-hotu hamutuk depois ita bele organiza a’an di’ak, bele sai forti hodi haree bá dezenvolvimentu bá rai ida ne’e no ikus mai, ita hotu-hotu nia kontribuisaun atu lori povu ne’e bá moris di’ak”, dehan Reitór.
Reitór salienta, Kooperasaun sira ne’e, ita presiza tebes UNPAZ, la’os instituisaun governu nian, maibe nia mós bele aijuda fó kontribuisaun ruma, karik ita nia governu presiza.
Familia bo’ot Universidade da Paz, agradese tebes bá Sr. Diretór Jeral, bele mai ho estrutura sira hotu, iha fatin ida ne’e, bele fó biban bá ami hodi halo parseiru no fó oportunidade bá ami para bele aijuda mós ami husi atividade balu husi diresaun estatistika nian, Reitór reforsa.
Aliende ne’e, Diretór Jeral Diresaun Nasional Estatistika, Sr. Elias dos Santos, hateten akordu ida ne’e importante tebes, oinsa ita bele kontribui hamutuk liuhusi atividade sira.
Iha parte seluk, Dekanu Fakuldade Ekonomia, Dr. Alexadre de Sousa Guteres, Lic. Eco. MM. Orgullu tanba momentu espesial ida ne’e ita bele raliza ho Diresaun Nasional Estatistika bele asina akordu ho Universidade da Paz, liuliu Fakuldade Ekonomia.
“Iha diskusaun balu ne’e ita halo, sei iha seminariu no estajiu profisional, ita asina nota entendimentu, tanba ita haree bá dezenvolvimemtu liuhusi informasaun sira, ne’ebé liuhusi instituisaun ida ne’ebé kredivelitas di’ak tebes, bele sai hanesan hun ida bá informasaun lo’os bá iha públiku”,haktuir Dr. Alexandre.
Partisipa iha atividade refere Magnifiku Reitór, Universidade da Paz, Dr. Adolmando Soares Amaral, Lic. Eco.,MM. Diretór Jeral Diresaun Nasional Estatistika, Sr. Elias dos Santos, ho ekipa, Dekanu husi Fakuldade 6, Xefe Departamentu sira, Diretor/a Unidade sira, inklui Estudante sira.