UNPAZ HO ANP SELEBRA MoU HODI SERVISU HAMUTUK IHA FUTURU

UNPAZ HO ANP SELEBRA MoU HODI SERVISU HAMUTUK IHA FUTURU

Dili-Universidade da Paz (UNPAZ) Magnífiku Reitór UNPAZ, Dr. Adolmando Soares Amaral, Lic. Eco.,MM. asina Memorandum Of Understanding (MoU) ho Prezidnte Autoridade Nasional Petróleo, Sr. Gualdino do Carmo da Silva, hodi servisu hamutuk ba área importante sira iha futuru, iha edifisiu ANP Farol Dili (08/05).

Dekanu Fakuldade Enjeñaria, Sr. José Manuel Maniquin, AP, Lic. Eng. M.,Eng. Hateten ohin UNPAZ liuhusi fakuldade enjeñaria, liu-liu departamentu Indústria marka tan istória ida, hodi halo tan kooperasaun entre instituisaun rua UNPAZ ho Autóridade Nasional Petróleo (ANP) oinsa bele servisu hamutuk entre ANP ho Universidade, atraves fakuldade enjeñaria liu-liu iha departamentu Indíustria, maibe la taka dalan ba iha departamentu rua seluk.

Nia esplika área ne’ebé propoin atu servisu hamutuk maka, siénsia ne’ebé iha fakuldade enjeñaria liu-liu iha programa estudu tolu ne’e mak hanesan, Exploration, Development, Health and Safety, Enviromental, Stakeholders Engagement, Information Communication and Technology (ICT) ho seluk tan, nune’e mós estudante finalista sira iha tempu badak sei hala’o estájiu iha instituisaun refere.

"Bainhira ita atu haruka estudante sira ba halo estájiu iha ANP, tuir regra ANP nian, ita tenki hala’o uluk akordu, hafoin bele haruka estudante sira hala’o estájiu, nune’e husi akordu ne’e bele regula estudante sira bele kumpri regra internal ANP no servisu ho responsabilidade, atu labele fó informasaun ne’ebé prezudika iha instituisaun ANP ne’e rasik",dehan Maniquin.

Dekanu ne’e salienta, bazeia ba konkordansia katak, tinan oin atividade sira liga ho servisu petróleo ho ANP ninian, sei envolve mós UNPAZ, liu-liu fakuldade enjeñaria, maibe husi diskusaun ohin mós la’os de’it iha siénsia enjeñaria de’it, maibe sei envolve mós sira husi siénsia direitu, depende ba polítika husi ANP ba kapasitasaun rekursu humanu iha seitór oi-oin. Espera katak estudante sira iha tempu badak ba estájiu iha ANP, sira bele kumpri regras sira no iha responsabilidade atu apriende buat ruma.

"Ita bele apriende iha aula, maibe apriende ba iha instituisaun seluk mós importante, nune’e bele aumenta koñesimentu estudante nian, liu-liu iha área petróleo, tanba área petróleo importante tebes ba ita nia rai, la’os ema ne’ebé servisu iha petróleo mak hatene mesak iha área ida ne’e, presiza mós espensaun ba ita nia estudante liu-liu finalista ne’ebé remata estudu, bele iha koñesimentu ituan iha área petróleo nian",tenik.

Dekanu mós subliña, tuir planu iha futuru sei servisu hamutuk, oinsa bele realiza workshop/seminariu liga ho área petróleo nian, ne’ebé sira sei mai fahe informasaun ba estudante sira kona-ba importansia husi seitór petróleo nian ba estudante sira hotu iha UNPAZ.

Entretantu Memorandum Of Understanding (MoU) ne’e, asina direta husi Magnífiku Reitór UNPAZ, Dr. Adolmando Soares Amaral, Lic. Eco.,MM. ho Prezidnte ANP, Sr. Gualdino do Carmo da Silva. Akompaña husi Dekanu Fakuldade Enjeñaria, Sr. José Manuel Maniquin, AP, Lic. Eng. M.,Eng. Xefe Departamentu na’in tolu, Indústria, Arkitetura no Enjeñaria Sivil. Inklui inklui komitiva husi ANP nian.