UNPAZ HATO O LAMENTASAUN BA EKIPA HUSI MESCC NEEBEHALO ISNPESAUN MAI UNPAZ DURANTE LORON LIMA

UNPAZ HATO’O LAMENTASAUN BÁ EKIPA HUSI MESCC NE’EBÉ HALO ISNPESAUN MAI UNPAZ DURANTE LORON LIMA

Lamentasaun refere estrutura Universidade da Paz hato’o liu husi komferensia imprensa iha aula Prof. Dr. Lucas da Costa, SE. MSi, iha kampus sentral Dili, kuarta-feira semana (04 Maiu 2022), relasiona ho vizita ida ne’ebé hala’o husi Funsionariu Ministériu Ensinu Superior Ciensia Cultura, mai iha Universidade da Paz iha semana ida liuba.

Tanba saida mak komferensia imprensa foin halo ohin loron, tanba Magnifiku Reitór foin fila husi vijita ida ba iha rai liur hodi halo kooperasaun ho Universidade lubuk ida iha rai liur.

#Objetivu husi komferensia ida ne’e mak, Universidade da Paz hato’o lamentasaun ho mekanizmu servisu ne’ebé mak la’o, entre Ministeriu Ensinu Superior no Universidade da Paz.

Universidade da Paz nu’udar instituisaun privadu, nia hateten ninia relasaun servisu ninia obrigasaun hasoru governu liuhusi Ministériu Ensinu Superior, UNPAZ la’os SUBORDINADU/ ka estrutura ou membru husi Ministeriu nian, relasaun servisu entre instituisaun Universidade da Paz no Ministeriu durante ne’e la’o ona.

Tinan-tinan Universidade da Paz sempre haruka ou submete relatoriu anual, ba iha Ministériu Ensinu Superior, lori esplika kondisaun tomak Universidade nian, para Ministériu bele hatene progresu ne’ebé mak akontese iha Universidade no bele akompaña atividade sira ne’ebé mak la’o iha instituisaun superior hotu-hotu.

ANAAA hanesan instituisaun governu nian, tinan-tinan halo mós avaliasaun akreditasaun ba iha Universidade sira inklui Universidade da Paz, rezultadu husi avaliasaun sira ne’e mak bele hatudu kualidade no kondisaun lolo’os husi Universidade sira inklui Universidade da Paz, avaliasaun ne’e hala’o husi peritus nasional internasional, ho kondisaun sira ne’e hotu mak UNPAZ hato’o ninia lamentasaun no protestu ba ekipa husi Ministériu Ensinu Superior ne’ebé mai halo auditoria/ mai halo inspesaun iha Universidade da Paz, maibe laiha karta koiñesimentu formal ba iha Reitór Universidade da Paz.

Visita ida ne’e akontese momentu Reitór Universidade da Paz halo hela viajen ba iha rai liur hodi halo kooperasaun ho Universidade sira iha rai liur nian, tanba ne’e atu hateten katak, ekipa ne’e mai uma na’in laiha e ekipa ne’e halo servisu nein koñesimentu husi uma na’in nian, tanba laiha karta formal mai iha Universidade da Paz ba iha Magnifiku Reitór, tanba ne’e mak UNPAZ la konsidera ekipa hanesan ekipa formal husi Ministériu Ensinu Superior ninian.

Ho nune’e rejultadu auditoria/inspesaun ne’ebé ekipa ne’e halo Universidade da Paz la rekoñese, no ikus liu mak Universidade da Paz sujere para Ministériu la’o tuir mekanizmu ne’ebé mak durante ne’e iha katak, iha ona instituisaun estadu nian ne’ebé halo avaliasaun ba iha Universidade sira inklui UNPAZ, ne’e mak ANAAA e Ministériu bele husu informasaun hotu-hotu kona-bá Universidade da Paz nian ba iha ANAAA, tanba sira mak reprejenta governu mai halo auditoria mai halo avaliasaun no fó akreditasaun ba iha Universidade da Paz.

Ida ne’e mak ami nia komferensia da imprensa, ami dejeizu katak, Ministeriu bele rona liu-liu Sr. Ministro bele rona katak, Universidade da Paz ho Ministériu ita parseiru, ita la’os ninia Xefe ho SUBORDINADU, lae ita parseiru hotu-hotu servisu ba iha povu timor, para atu hari’i timor oan sira ne’ebé mak matenek ho kapasidade lori dezenvolve ita nia nasaun.

Mak ne’e de’it ami nia Komferensia da Imprensa e origadu barak ba ita hotu nia atensaun.