UNPAZ HALO ENSAIU BA PREPARASAUN ORIENTASAUN 2024
Dili-Universidade da Paz (UNPAZ) hala’o ensaiu loron dahuluk ba preparasaun atividade orientasaun ba kandidatu estudante foun tinan akadémiku 2024 nian, iha Salaun José Kasimiru (23/02).
Magnífiku Reitór Universidade da Paz, Dr. Adolmando Soares Amaral, Lic. Eco.,MM. hateten modelu orientasaun la hanesan ho ita boot sira-nia eskola origen, modelu orientasaun UNPAZ atu forma ema, atu sai líder no líderansa iha tempu sira tui mai, tanba ne’e, husu ba imi atu mai ita hamutuk, hodi apriende siensia no teknologia iha UNPAZ ho esperiensia ne’ebé mak iha.
“Ami na’in hira ne’ebé ohin hamrik iha oin ne’e, tanba ami horseik no imi ohin, sé ita hotu ohin, ohin ita tur hotu iha ne’eba, ema seluk mak hamrik iha oin, tanba ami horseik, ami iha responsabilidade moral atu transmite saida de’it mak ami hetan horseik ba ita bo’ot sira, aban bairua ita bo’ot sira sai líder no líderansa, maka husu ba ita bo’ot sira katak, tenki sai atan no servidór ne’ebé di’ak ba povu no rai ida ne’e”,dehan Reitór UNPAZ.
Líder masimu ne’e husu ba estudante sira, durante loron tolu nia laran, ne’ebé sei tuir orientasaun, maka husu ba ita bo’ot sira, atu rona didi’ak ita nia líder importante sira, sira sei mai fahe sira-nia esperiensia ba ita bo’ot sira, hakarak sai hanesan sira maka, iha momentu sira mai ko’alia tenki rona no tau iha kakutak, nune’e bele aplika iha prosesu aprendizajen sira tuir mai.
Desizaun ne’ebé ita bo’ot sira deside mai hamutuk iha Universidade da Paz, desizaun ida ke, ita bo’ot sira tetu tasak tiha ona, depois ita bo’ot sira asesu mai iha ne’e, universidade iha timor barak, maibe ita bo’ot sira hotu deside mai iha UNPAZ, ha’u fiar katak, imi nia desizaun ne’ebé lasala no desizaun ne’ebé los ba imi ho familia ba povu no rai dia ne’e, tanba ne’e husu ba ita bo’ot sira aproveita tempu ne’e ho di’ak.
Entretantu ensaiu ba loron dahuluk ne’e, partisipa husi Magnífiku Reitór Universidade da Paz, Dr. Adolmando Soares Amaral, Lic. Eco.,MM. Terseiru Vise Reitór Asuntu estudantil no Antigus Alunus, Prezidente komisaun Organizadóra ba Atividade Orientasaun, Ekipa Komisaun sira hotu inklui Estudamte foun sira iha Universidade da Paz.
Universidade da Paz nudar instituisaun Superior edukativus nebe realiza apredizazen, pesquizas, no sai servidor/pengabdian ba sidadaun sira hodi fiar metin ba direitu fundamental ema nian, tuir normas Universal sira no konstituisaun RDTL 
