UNPAZ- FSP REALIZA SEMINARIU NASIONAL

UNPAZ-FSP REALIZA SEMINARIU NASIONAL

Dili-Universidade da Paz (UNPAZ) liuhusi Fakuldade Saúde Públika nia Departamentu Biostatistika No Sistema Informasaun Ba Saúde realiza seminariu nasionál ho tema”Perspetiva Dengue Iha Kontestu Saúde Públika, iha Salaun Multifunsaun FSP (22/01).

Dekanu Fakuldade Saúde Públika, Sr. Martinus Nahak Lino, AMKL, Lic. SP.M.AP. hateten seminariu ohin haree liu ba fenomena ne’ebé akontese iha ita nia rai, depois de pandemia covid-19, agora iha tán moras dengue ne’ebé kada loron ita haree aumenta ba bei-beik nomós fó ona impaktu ba numeru mortalidade.

Nia hatutan, haree ba moras refere ne’ebé akontese, husi parte akadémiku nian ita persija fó hanoin liuhusi workshop sira, para ita fó sai ba estudante sira, la’os ba UNPAZ de’it maibe marka prejensa mós husi estudante Cristal, UNITAL, UNDIL, hodi tuir seminariu refere.

“Problema moras dengue, la’os problema Ministeriu Saúde nian, de’it, maibe problema ba ita hotu ne’ebé hela iha sidade ida ne’e, ita hotu-hotu tenki iha responsabilidade ba kazu ida ne’e”, Sr. Martinus.

Husi parte akadémiku ita halo koloborasaun ho parte saúde nian nomós estudante sira, atu nune’e bele fahe informasaun sira ne’e ba iha komunidade, tenik Nia.

Aliende ne’e, Orador II (Eis Diretór Nasional Saúde Públika MS), Sr. Carlitos Correia Freitas, Lic.SP. hatutan, ohin reprezenta husi parte Ministeriu Saúde, mai hakarak atu ko’alia ituan kona-ba, Politíka no estratejia saida mak Ministeriu da Saúde, agora dadauk uza hela hodi halo intervensaun ba surtu moras dengue ne’ebé akontese iha ita nia rai.

“Importante tebes tanba estudante sira hanesan kanal di’ak ida, para atu transmite informasaun ne’e ba iha sira nia familia no vijiñu nomós ba komunidade enjeral, tanba sira nu’udar ema matenek na’in fasil liu sira bele pasa informasaun lo’os no klaru ba iha komunidade sira”,katak Sr. Carlitos.

Estudante sira ami husu nafatin sira nia apoiu para bele tulun fahe informasaun sira ne’ebé ami trasmite ona ba sira, labele hela de’it iha sira, maibe tenki lori mós ba iha fatin ne’ebé sira hela ba, liu-liu ba sira nia familia, dehan Nia.

Partisipa iha seminariu refere, Dekanu Fakuldade Saúde Públika, Sr. Martinus Nahak Lino, AMKL, Lic. SP.M.AP. Orador I Dr. Aniceto Cardoso Barreito,SPA.,M.Kes(Eis Diretór HNGV) Dosente Funsionariu, inklui mós Estudante CRISTAL, UNDIL, UNUTAL, UNPAZ.