UNPAZ ASINA NOTA INTENDEMENTU HO NGO RAEBIA TIMOR LESTE

#UNPAZ# 18 SETEMBRU  2021

UNPAZ ASINA NOTA INTENDEMENTU HO NGO RAEBIA TIMOR LESTE

Dili-Universidade da Paz (UNPAZ), liuhusi Fakuldade Teknologia Agrikola hala’o Serimónia Asina Nota Intendementu (Mou) ho NGO Raebia Timor-Leste, ba Programa Peskiza Hamutuk, Estudu Komparativu no Estajiu Profisionál, iha Aula Prof.Dr.Lucas da Costa (18/09).

Magnifiku Reitór Universidade da Paz, Dr. Adolmando Soares Amaral, Lic, Eco. MM. hateten kooperasaun UNPAZ ho NGO Raebia Timor-Leste, la’os buat foun, maibe ita sai tiha ona parseiru iha tempu ne’ebé naruk ne’ebé sei dauk sai parseria, ohin ita formaliza tiha asina nota intendementu ida para UNPAZ liuhusi Fakuldade Teknologia Agrikola ho Departamentu rua ne’ebé tutela ba iha Fakuldade nia okos bele sai parseria ba NGO Raebia.

"Ita aproveita sira nia matenek no esperiensia, atu tulun ita para organiza ita nia programa estudu sira no Fakuldade para ita mós bele organiza iha universidade, liuhusi kooperasaun sira ne’ebé universidade halo ho NGO sira nia esperiensia ba pratika, ita aproveita para bele hasa’e koñesementu interna ba estudante sira para prepara a’an sai rekursus umanus ida ne’ebé ho kapasidade no kualidade", dehan Reitór.

Dekanu Fakuldade Teknologia Agrikola, Sr. Joni dos Santos, Lic. Tec.,Agr.,M. Agr, agradese no apresia Magnifiku Reitór ne’ebé ho nia politíka fó liberdade ba Fakuldade sira hotu ida-idak bele buka meus no alternativas oi-oin hodi bele buka kooperasaun, ikus mai liuhusi universidade bele halo koopersaun di’ak ho parseiru sira.

"NGO Raebia Timor-Leste, pratikamente ita halo atividade barak, ita nia alumi mós servisu iha NNG ne’e, ita nia estudu komparativu sira estájiu profisionál ita hala’o hela, maibe ita seidauk formaliza baze legal ida, ohin ita formaliza legalmente iha kooperasaun ida metin ba oin kontinua melhora di’ak liu tán ita nia kooperasaun liuhusi atividade ne’ebé ita nia estudante sira halo", tenik Dekanu FTA Sr. Joni.

Aliende ne’e, Ditretor Exekutivu NGO Raebia Timor-Leste, Ir. Xisto Martins.M.Ega.Agn (Phd.Cand), salienta, lori NGO Raebia nia naran agradese no apresia inisiativa ida ne’ebé tuda husi estrutura Magnifiku Reitór ninian ne’ebé atu valoriza ita nia servisu hamutuk durante ne’e hodi formaliza.

"Ohin biban ida ne’ebé di’ak ita halo ida ne’e atu bele públika ba ita nia rai katak ita halo ona buat ruma iha ne’e, maske ita hasoru hela krize bo’ot ida invade hela iha ita nia rai, servisu hamutuk ne’e atu kesi ita para la’os temporaria de’it bainhira ita persiza, maibe formaliza ne’e ba oin kontinua ita nia servisu hamutuk", haktuir  Ditretor Exekutivu NGO Raebia Timor-Leste, Ir. Xisto.

Pro Reitor Asuntu Kooperasaun Interna no Externa, Sr. Luis Pereira Cardoso.,DipCs.,Lic.CSH.,MA.,Mcs. hatutan kooperasaun ne’e importante tebes ho NGO lokal sira liu-liu iha rai laran, tanba situasaun covid-19 ita labele halo koopersaun externa, ho ida ne’e mak haree liu ba kooperasaun interna nian, ohin ita asina nota intendementu ho GNO Raebia, ne’ebé hanesan organizasaun ida ne’ebé luta ba agrikultura nian, ho ida ne’e mak ita halo kooperasaun ho sira oinsa bele fasilita estudante sira bele peskiza no estajiu profisional.

"Kooperasaun ida ne’e hodi hametin liu tán, tanba formalmente entre UNPAZ ho NGO Raebia iha tiha ona ligasaun kuaze tinan barak nia laran, ita nakloke a’an ba instituisaun lokal sira tanba teorikamente ita nia estudante sira estuda iha ne’e, pratikamente ita persiza haforsa tán estudante nia kapasidade liuhusi NGO sira ne’ebé iha ona esperiensia barak ba asuntu Teknologia agrikola nian", tenik Pro Reitor Asuntu Kooperasaun Interna no Externa, Sr. Luis

Partesipa iha asina nota intendementu ne’e, Magnifiku Reitór Universidade da Paz, Dr. Adolmando Soares Amaral, Lic, Eco. MM. Ditretor Exekutivu NGO Raebia Timor-Leste, Ir. Xisto Martins.M.Ega.Agn (Phd.Cand), ho ekipa, Proreitores, Dekanu sira, Diretor Unidade, Xefe Departamentu, Dosente, Funsionariu, inklui Estudante sira.