UNPAZ ASINA NOTA ENTENDIMENTU HO JICA-BTL.EP

UNPAZ ASINA NOTA ENTENDIMENTU HO JICA-BTL.EP

Dili-Universidade da Paz (UNPAZ) hala’o serimónia asina nota agrimentu entre UNPAZ ho JICA-BTL.EP, hodi implementa servisu hamutuk iha futuru, iha Aula Prof. Dr. Lucas da Costa (25/02).

Magnifiku Reitór Universidade da Paz, Dr. Adolmando Soares Amaral, Lic. Eco.,MM. hateten UNPAZ mós hola nia papel importante ida bele servisu hamutuk ho parseiru sira ne’ebé mak sai ona parseria ba iha governu para bele aijuda no detekta failansu sira ne’e ita iha, para bele aijuda governu hodi trasa iha sira nia polítika no tau orsamentu iha tempu tuir hodi rezolve problema sira ne’e.

“Atu lori povu ba moris di’ak, responsabilidade moral ita hotu ne’ebé moris iha nasaun ida ne’e, iha tempu ida ne’e Universidade nia kontribuisaun ho parseiru sira para bele aijuda governu”,dehan Reitór.

Reitór, Agradese ba JICA Governu Japaun, ne’ebé mak mai fó ona aijuda ba governu Timor-Leste no Timor-Leste, iha seitores oi-oin, ba dala ida JICA fó tan oportunidade UNPAZ atu bele servisu hamutuk ho sira, asegura sira nia polítika Japaun mai iha timor, no ita timor ba governu atu lori povu moris di’ak ba dezenvolvimentu rai ida ne’e.

Edidat Karo-Karo, Project Assistant, ne’ebé reprezenta, Chief Advisor TEC Internasional Co.,Ltd, Sr. Onho Atsuo, klarifika husi koperasaun ida ne’e, UNPAZ ho JICA sei servisu hamutuk hodi implementa programa sira ne’ebé mak ita atu halo iha futuru oin mai.

Sorin seluk, Vice Reitor Asuntu Koperasaun Interna no Externa, Sr. Luis Pereira Cardoso, Dip.Cs.,Lic. CSH.,MA.,Mcs. Esplika ita ohin asina nota agrimentu ida ho JICA, hanesan ajensia Internasional ne’ebé iha Timor kleur no sira halo ona programa barak.

“Importante tebes UNPAZ halo koperasaun ho JICA, iha programa ne’ebé sei implementa hamutuk iha tempu mai, ita espera ida ne’e bele fó benefisiu ba Universidade nomós ba JICA”,katak Nia.

Partisipa iha atividade refere, Magnifiku Reitór Universidade da Paz, Dr. Adolmando Soares Amaral, Lic. Eco.,MM. ho Estrutura Tomak kompostu husi Dekanu Fakuldade 6, Xefe Departamentu no Programa estudu Mestradu, Vice Reitor sira hotu, Pro-Reitor sira no Direktor Unidade sira, Chief Advisor TEC Internasional Co.,Ltd, Sr. Onho Atsuo, ho Ekipa.