UNPAZ ASINA NOTA ENTENDEMENTU HO UNIVERSITAS TELKOM INDONESIA

#UNPAZ# 22 SETEMBRU 2021

UNPAZ ASINA NOTA ENTENDEMENTU HO UNIVERSITAS TELKOM INDONESIA

Dili-Universidade da Paz (UNPAZ) hala’o serimónia asina nota entendementu entre UNPAZ ho Universitas Telkom Indonesia, kona-ba programa biblioteka online liuhusi Zom, iha Aula Prof. Dr. Lucas da Costa (22/09).

Magnifiku Reitór, Dr. Adolmando Soares Amaral, Lic. Eco., MM, hateten UNPAZ ho Universitas Telkom Indonesia asina akordu ida atu servisu hamutuk, kona-ba programa biblioteka online, para dosente estudante ho funsionariu sira bele asesu ba referensia sira ho disiplina siénsia sira ne’ebé iha.

"Biblioteka online ne’e bele ajuda ita nia dosente sira bele asesu ba referensia sira, para prepara materia sira ho di’ak, inklui estudante sira mós bele asesu liuhusi link ne’ebé iha, entre kooperasaun UNPAZ ho Universitas Telekom Indonesia ba programa biblioteka online", tenik Reitór.

Nia hatutan, Servisu hamutuk la para iha ne’e de’it, maibe sei haree mós progresu akadémiku ba prosesu aprendisajen sira, ita sei haruka ita nia estudante sira ba iha ne’ebá, no sira mós sei haruka sira nia estudante sira mai, no ita sei halo estudu komparativu, ita nia funsionariu sira mós ba halo estudu komparativu iha ne’ebá hodi aprende ema nia jestaun sira, para mai ajusta hodi hadia ita nia iha ne’e.

Partesipa atividade refere, Magnifiku Reitór, Dr. Adolmando Soares Amaral, Lic. Eco., MM, Prezidente Fundasaun Neon Metin, Proreitores, Dekanu, Xefe Departamentu, Dosente, Funsionariu inklui Estudante sira.