![UNPAZ ASINA NOTA ENTENDEMENTU HO (CRS-TL)](https://unpaz.tl/asset/foto_berita/83e7f020-bc16-4d59-a10a-f15b3f604ecc222.jpg)
#UNPAZ# 02 JULLU 2021
UNPAZ ASINA NOTA ENTENDEMENTU HO (CRS-TL)
Dili-Universidade da Paz (UNPAZ), liuhusi Fakuldade Agrikola hala’o serimónia asina nota entendementu entre UNPAZ ho Ajensia Catolic Relief Service Timor-Leste (CRS-TL), iha programa Timor-Leste Farmer to Farmer, ne’ebé asina diretamnte husi Magnifiku Reitór Universidade da Paz, Dr. Adolmando Soares Amaral, Lic, Eco. MM. ho Diretóra Exekutivu (CRS-TL) Sra. Yane Pinto, iha Salaun Pós-Graduasaun (02/07).
Magnifiku Reitór Universidade da Paz, Dr. Adolmando Soares Amaral, Lic, Eco. MM. hateten Universidade da Paz, ita nia mandatu mai ho politika ida, reforma no kualidade, reforma no kualidade la’os ita mesak de’it atu garantia kualidade, ita tenki nakloke no halo kooperasaun ho ita nia parseiru sira para ita aproveita matenek no esperiensia ne’ebé sira iha hodi dezenvolve ita nia instituisaun, no iha prosesu tomak, ita nia estudante sira bele hetan kualidade ida ne’ebé di’ak atu bele hatan ba nesesidade ba estadu no governu nian.
Dekanu Fakuldade Agrikola Sr. Joni dos Santos, Lic. Tec. Agr.,M. Agr. hatutan apresia ba Magnifiku Reitór nia politika ne’ebé estabelese iha estrutura ida ne’e, hodi loke espasu ba Fakuldade ida-idak bele halo nia kontaktus ho NGO nasionál no internasionál nomós governu ne’ebé iha relevansia ho atividade Fakulkdade refere, liuhusi ita nia Pro-Reitór Kooperasaun Asuntu Interna no Externa, ne’ebé servisu hamutuk hodi bele hala’o kooperasaun di’ak ba entidades hotu-hotu ne’ebé mak bele kontribui ba dezenvolvimentu iha área edukasaun liu-liu iha área agrikultura nian.
Aliende ne’e, Diretóra Exekutivu (CRS-TL) Sra. Yane Pinto, salienta tanba-sá ami mai iha Universidade da Paz, ami hanoin iha ne’e potensia bo’ot atu suporta ita nia tós na’in, espera alin sira eskola iha ne’e lao’s atu servisu iha kantor, tanba wainhira ita sai estudante agrikultura ita pronto atu servisu mós iha ita nia knua, atu suporta ita nia tós na’in sira, liuhusi parseria ida ne’e CRS-TL sei servisu hamutuk ho Sr. Dekanu ho alin estudante sira iha oportunidade servisu hamutuk hodi ajuda ita nia tós na’in.
Partesipa iha atividade refere, Magnifiku Reitór Universidade da Paz, Dr. Adolmando Soares Amaral, Lic, Eco. MM. Diretóra Exekutivu (CRS-TL) Sra. Yane Pinto, akompaña husi Maneger CRS-TL, Sr. José Maia Alves Omai, Pro-Reitór, Dekanu, Dosente, Funsionariu, Inklui estudante sira.