UNPAZ ABERTURA BA AULA DAHULUK PROGRAMA ESTUDU MESTRADU 2025

UNPAZ ABERTURA BA AULA DAHULUK PROGRAMA ESTUDU MESTRADU 2025

Dili-Universidade da Paz (UNPAZ) liuhusi Programa Mestradu UNPAZ, hala’o serimónia abertura aula dahuluk tinan akadémiku 2025. Abertura ba Aula Estudu Akademiku ne’e ho tema “Dezenvolve Rekursu Humanu Ne’ebé Kualidade” halao iha Aula Prof. Dr. Lucas da Costa (22 de Fevereiru 2025).

Abertura ne’e Vise Reitor Asuntu Programa Mestradu no Doutoramentu, Dr. Martinus Nahak Lino, AMKL, Lic. SP.,M.AP.,M.SP. hato’o bem-vindu ba orador na’in tolu ne’ebé iha disponibilidade hodi marka prejensa ba Abertura ba Programa Mestradu iha UNPAZ, espera ho prejensa orador sira nian ne’e bele fahe informasaun ne’ebé di’ak no adekuadu ba estudante foun mestradu UNPAZ nian, ligadu ho tema ne’ebé oferese ona ba orador sira.

“vise ne’e konta katak ita hanoin tempu ida agora iha mudansa polítika global nomós rejional, tanba ne’e mak liu husi abertura programa Aula ba mestradu UNPAZ, ne’e orador na’in tolu nia prejensa bele halo estudante sira hetan informasaun pozitivu no sai mós bukae ba estudante sira ida-idak iha futuru ne’ebé di’ak”.

Sorin seluk, Prezidente CFP, Dr. Agostinho Letêncio de Deus. Reforsa tan katak programa mestradu iha rai laran di’ak no importante tebes, ba estudnate foun sira tanba sira la’os estuda de’it teoria, maibe sira mós deskute kona-ba dezafiu sira ne’ebé enfrenta iha rai laran. husi sira-nia diskusaun lor-loron sei relevante ba saida mak ita presiza no resposta husi estudante Sira.

Presidente ne’e husu ba kandidatu Estudante sira la’os de’it atu duni tuir sertífikadu no bainhira mak ita remata lalais, maibe ba rai ida ne’e ita presiza ema ne’ebé mak kualidade no kritiku, maibe tenki lori mós solusaun.

“Edukasaun la’os maka resposta buat hotu, maibe edukasaun hanesan meius ida atu buka resposta ne’ebé di’ak problema hotu-hotu iha rai laran, tanba ne’e estudante sira tenki uza oportunidade ida ne’e, hodi deskute problema ne’ebé ita nia nasaun iha prosesu dezenvolvimentu konstrusaun estadu nian”,tenik Prezidente CFP.

Iha abertura aula dahulu programa Estudu mestradu UNPAZ, ne’e hetan mós prejensa husi orador importante na’in, Orador I, Embaxador Timor-Leste ba Estadus Unidus da America, José Luis Guterres. Ko’alia kona-bá “Impaktu Polítika Prezidente Foun Estadus Unidus America Hapara Suporta Finanseiru ba Nasaun Sub-Dezenvolvidu”. Orador II, Prezidente CFP, Dr. Agostinho Letêncio de Deus.“Jestaun Atendimentu Administasaun Públiku Iha Governu Timor-Leste”. No Orador III, Xefe Departamentu AGPS-FSPCM, Belarmino da S. Pereira, Lic. SP.,MM-RS.,Ph.D. “Polítika Saúde Iha Timor-Leste”.

Entretantu iha atividade refere, abertura husi Vise Reitor Asuntu Programa Mestradu no Doutoramentu, Dr. Martinus Nahak Lino, AMKL, Lic. SP.,M.AP.,M.SP. ne’ebé reprezenta Magnífiku Reitór UNPAZ. Partisipa mos husi estrutura Universidade, Dosentes inklui Kandidatu estudante Programa Mestradu UNPAZ.