UNIVERSIDADE DA PAZ REALIZA SEMINARIU HODI SELEBRA LORON MUNDIAL FILOSOFIA.

UNIVERSIDADE DA PAZ REALIZA SEMINÁRIU HODI SELEBRA LORON MUNDIÁL FILOSÓFIA.

Dili- Universidade Da Paz (UNPAZ), servisu hamutuk ho Prezidensia da Repúblika (Assessoria da Fraternidade Humana) no UNESCO hodi realiza serimónia, Simpósio Dia Mundial da Filosofia ho tema “Desenvolvimento de Uma Sosiedade Solidaria e Fraterna”, Estudo Histórico Constituicional, Cultrual Filosofico e Tecnological, iha salaun José de Casmiro (18/11).

Iha serimónia simpósio ne’e, Líder Karismátiku Kay-Rala Xanana Gusmão nu’udar orador dahuluk ne’ebé fahe hanoin kona-ba Fraternidade Umana ne’e esplika, konseitu definisaun filozófia iha oioin, maibé importante husi filozófia mak forma hanoin hotu ho rasiósinu saida mak lo’os no saida mak sala, hodi nune’e bele hari’i lójika iha analiza ita-nia vida laran.

“filozófia iha dalan ida atu buka koñesimentu hodi uza metodolójiku ida no argumentasoes sira ho di’ak, liuhusi baze ne’ebé mak metin tanba argumentasoes sira ne’ebé ita aprezenta sai hanesan produtu husi reflesaun ne’ebé profunda. Wainhira ita tama ho hanoin ne’e, maka ita bele dehan katak, ita kaer dadaun dalan ba pensamentu livre, krítiku no autónomu, ne’ebé hahú ho hanoin lójika no objetividade”,tenik Líder Karismátiku.

Iha sorin seluk, Magnifíku Reitór Universidade da Paz, Dr. Adolmando Soares Amaral, Lic.Eco, MM. haktuir semináriu ne’e realiza tanbá servisu hamutuk ho asesória fraternidade umana, iha ne’ebé hetan partisipa husi oradór mai husi parte oioin, atu fahe mós hanoin ba ita-nia estudante sira kona-ba fraternidade umana nian.

“Ita servisu hamutuk ho gabinete liu-liu asesória ba fraternidade umana hodi organiza semináriu ne’e, tanbá Timor agora ba oin ona no tempu ona atu Timor bele ajuda malu, tane malu ba buat di’ak liu-liu interese povu nian. Ita hakarak ba oin fraternidade umana ne’e labele tuir konseitu de’it, maibé tuir duni programa estudu ida atu fó oportunidade ba ita-nia joven sira, hodi sira bele mai aumenta tan sira-nia koñesimentu, liu-liu iha ensinu superior, atu sira kontinua mehi bo’ot ne’ebé mak Maun Xanana fahe kona-ba fraternidade umana nian”,dehan Reitór.

Magnífiku Reitor ne’e esplika liután katak, semináriu ne’e importante tebes ba estudante sira, tanba agora dadaun ita-nia situasaun hanesan nasaun foun ida ne’ebé restaura ona independénsia, maibé iha problema joven, iha problema sosiais no problema oioin, ho buat sira ne’e ita hahú ho buka solusaun no buka alternativa liuhusi hanoin filozófika, haree no análiza hodi foti desizaun ruma, mak ohin loron ita hahú fahe hanoin kona-ba faternidade umana.

Entretantu iha serimonia ne’e, hetan partisipa orador oioin no partisipa masimu mós husi estrutura senadu Universidade, Prezidente Konsellu Administrasaun (FNM), Dekanu husi Fakuldade 6, Pro-Reitor, Diretor/a Unidade sira, Dosente ho Funsionariu sira, nomós entidades hotu, inklui estudante universitáriu sira hanesan; estudante UNTL, esudante universitáriu privadu nian ne’ebé hamutuk ho nia reprezentante sira, nomós estudante Universidade da Paz rasik.