![UNIVERSIDADE DA PAZ, LIUHUSI FAKULDADE ENJENARIA HALAO SERIMONIA JUDISIUM BA DALAN XIV](https://unpaz.tl/asset/foto_berita/2952acd5-0734-43d3-8915-a7ccd23796b7.jpg)
Dili 16 de Dezembro 2020
FAKULDADE ENJEÑARIA PRODUS TAN NIA EMA 326
Dili-Universidade da Paz, liuhusi Fakuldade Enjeñaria Hala’o serimonia Judisium ba Departamentu Enjeñaria Sivil ba dala IV no Departamentu Arkitetura i Industria hala’o Judisium ba dala XIV, Ho tema ba serimonia Judisium “Matak Malirin’’Sai Alumi Fakuldade Enjeñaria Unpaz Ho Kualidade No Responsabilidade Liuhusi Kreativu No Inovasaun”, Kampus Unpaz (16/12).
Liuhusi Judisium ne’e, Dekano Fakuldade Enjeñaria Sr. Jose Manuel Maniquin, A.P.,Lic.,M.Eng. iha nia diskursu husu ba Judisiariu sira simu medalla labele oin suar tenki simu ho kontente, tanba prosesu tinan haat ou lima la’os buat fasil, sai alumi tenki iha responsabilidade hodi habelar informasaun no koñesimentu ne’ebé iha ba iha komunidade no sosiedade, dehan Dekano.
Nune’e mós Magnifiku Reitór Universidade da paz, Dr. Adolmando Soares Amaral, Lic, Eco. MM, husu ba Judisiariu sira atu kria rasik kampu de trabalhu, hodi fó espasu ba ema seluk atu hamutuk ba objetivu ida, no ita gradua iha Universidade da Paz la’os atu ba servisu iha Governu, ita gradua atu ajuda Governu atu hamenus problema ba Governu no Estadu, dehan Reitór.
Iha sorin seluk, reprezentante Judisiariu, Agustino da Conceição, hato’o agradese ba inan-aman nia domin no pasiensia tomak ne’ebé suporta ona oan to’o ohin loron, agradese mós ba Universidade ho estrutura tomak iha Fakuldade, ba Dosente sira nia pasiensia hodi prepara materia ne’ebé iha hodi forma rekursu ne’ebé di’ak no kualidade iha nasaun ida ne’e, maske iha prosesu nia laran halo manorin na’in sira ulun moras, maibe sira nunka suspira tanba sira hakarak estudante sira susesu, dehan Agustino.
Aliende ne’e reprezentante inan-aman, Sr Albertino de Jesus, orgullu tebes ba Magnifiku Reitór ho nia estrutura nia esforsu tomak no mós ba Dosente sira nia esforsu hodi partilia ona siénsia ba ami nia oan sira ohin simu ona Judisium, no matenek sira ne’ebé iha sai hanesan bukae ida ba sira nia vida no ba sosiedade, tenik Albertino.