SESAUN ESTUDU NO EXPOZISAUN TEKNIKU FEDERASAUN SHORINJI KEMPO TIMOR-LESTE

SESAUN ESTUDU NO EXPOZISAUN TEKNIKU FEDERASAUN SHORINJI KEMPO TIMOR-LESTE

Dili-Universidade da Paz (UNPAZ) liuhusi Federasaun Shorinji Kempo hala'o serimónia abertura "Sesaun Estudu No Expozisaun Tekniku Federasaun Shorinji Kempo Timor-Leste, ho tema "Domin La Ho Forsa Ne'e Frakeza No Forsa La Ho Domin Ne'e Vandalismu",Iha Salaun José Kasimiru UNPAZ (29/07) horseik.

Dekanu Fakuldade Enjeñaria, Sr. José Manuel Maniquin, Lic. Eng.,M.Eng Reprezenta Magnifiku Reitór UNPAZ, hateten fatin ida ne'e oferese ba fatin desportu nian, tanba universidade tenki haree ema hotu no tau matan ba juventude sira ne'ebé mak iha talentu.

"Labele sente ita boot sira hanesan bainaka, maibé sente katak ita boot sira uma na'in ba universidade da paz, tanba ami sente kontente atividade desportu ne'ebé hetan rekoñese husi governu liuhusi Ministériu juventude desportu rekoñese, nune'e bele fó apoiu ba juventude nomós aumenta sira nia talentu iha área desportu nian",katak Maniquin.

Vise Prezidente Shoriji Kempo Timor-Leste, hateten objetivu husi atividade ne'ebé mak ohin realiza iha UNPAZ ne'e, primeiru atu kria no kesi amizade ida ne'ebé mak Shorinji Kempo iha, tanba ne'e atividade ida ne'e, importante tebes, oinsá atu kapasita kensi sira nia tekniku sira, nune'e bele mellora di'ak liu tan, atu hotu-hotu bele kompete iha kompetisaun rezionál nomós Internasionál.

Ministru Juventude, Desportu, Arte no Kultura (MJDAK) Nelio Isaac Sarmento, dehan ha'u akompña Shorinji Kempo kleur tebes, no ha'u rasik asiste bainhira Shorinji Kempo hetan midalia osan mean iha Jakarta, maibé depois de ida ne'e ita kontinua nafatin eziji komfederasaun sira desportu Timor-Leste, nune'e kempo bele eziste iha kompetisaun iha sigams.

"Tanba ne'e ha'u iha esperansa boot katak, imi bele iha kompetisaun nasionál kempo iha Timor-Leste, ho ida ne'e alin sira lalikan baruk atu partisipa iha formasaun no treinu kempo, maibé ita boot sira nafatin treinu no disiplina hodi partisipa iha eventu nasionál liuliu kompetisaun Kempo ne'ebé la kleur tan ita sei hala'o iha Timor, tanba ne'e agradese ba federasaun Kempo bele forma joven sira bele kualifikadu iha área ida ne'e",dehan Ministru Juventude Desportu.

Embaixadór Japaun Timor-Leste, Kimura Tetsuya, agradese ba treinador sira hodi Japaun mai iha Timor-Leste, hodi treinu atleta sira to'o ohin loron, tanba ne'e ha'u kontente tebes partisipa iha eventu ohin loron nian, tanba ha'u rasik mós prátika Shorinji Kempo durante ha'u nia tempu universitáriu.

"Shorinji Kempo mai ho objetivu la'ós de'it haforsa fíziku, maibé haforsa mós mental no oinsá hala'o moris ne'ebé mak di'ak liu, liuhusi respeita ema seluk hala'o tuir regulamentu sira no aprende disiplina, tanba ne'e ha'u fiar katak kensi sira sei prátika di'ak liu tan Shorinji Kempo di'ak liu tan iha fatin ida ne'e nomós kontribui ba paz nasaun ida ne'e iha futuru",tenik Embaixadór.

Entretantu iha abertura eventu Shorinji Kempo ne'e, loke direta husi Dekanu Fakuldade Enjeñaria, ne'ebé reprezenta Magnifiku Reitór UNPAZ, hetan partisipa husi, Vise Prezidente Shorinji Kempo Timor-Leste, Ministru Juventude, Desportu, Arte no Kultura (MJDAK) Nelio Isaac Sarmento, Embaixadór Japaun Timor-Leste, Kimura Tetsuya. Komvidadus sira hotu, inklui atleta sira.