SERIMONIA TOMADA DE POSSE SENADU NO ESTRUTURA UNPAZ PERIODU 2024-2029

SERIMÓNIA TOMADA DE POSSE SENADU NO ESTRUTURA UNPAZ PERÍODU 2024-2029

Dili-Universidade da Paz (UNPAZ) organiza Serimónia Tomada de Posse Senadu no Estrutura UNPAZ Períodu 2024-2029, ne’ebé posse direta husi Magnífiku Reitór, Dr. Adolmando Soares Amaral, Lic. Eco.,MM. Iha Salun José Kasimiru (05/11/24)

Prezidente Konsellu Administrasaun FNM, Eng. José Menezes, M. FoodTech. Hato’o parabens ba senadu no estrutura UNPAZ, ne’ebé simu ona posse iha loraik ida ne’e, dejeizu no susesu ba imi hotu iha Universidade da Paz.

“Kna’ar ne’ebé oferese ba ita tenki ho responsabilidade, labele sente pozisaun ne’e hanesan bai-bain ne’ebé ita sente ona, maibe tenki asumi ho responsabilidade no akuntabilidade atu lori universidade ne’e ba futuru ne’ebé mak di’ak ba ita hotu nomós ba estudante sira ne’ebé ita serbí, ida ne’e mak nia finalidade”,dehan Prezidente FNM.

Iha fatin hanesan, Magnífiku Reitór UNPAZ, Dr. Adolmando Soares Amaral, Lic. Eco.,MM. hateten ba oin ne’e hotu-hotu tenki peskiza, labele sai dosente ne’ebé tama iha sala laran lé ema nia konseitu no hanoin depois ba esplika tutan ba estudante sira ne’ebé laloos.

“Dosente tenki halo peskiza barak nune’e iha prosesu aprendizajen bele halo esplikasun ne’ebé di’ak ba estudante sira, bazeia ba peskiza ne’ebé iha. Sai dosente tenki vokasaun, sé ema ida sai dosente laiha vokasaun tanba de’it nia gelar maka ita obriga nia hanorin maka nia laiha jestu”,tenik Reitór UNPAZ.

Reitór hato’o parabens ba estrutura sira hotu ne’ebé simu ona posse iha loraik ida ne’e, ita simu tan responsabilidade dala ida tan no foti tan risku ba daruak. Tanba ne’e ita servisu ho responsabilidade no ida ne’ebé imi nia direitu foti, maibe ida ne’ebé la’os imi nia direitu lalika, tanba orsamentu ne’ebé ita halibur mai husi sakrifisiu lubuk ida husi inan aman.

Entretantu iha eventu ida ne’e, partisipa husi, Prezidente Konsellu Administrasaun FNM, Eng. José Menezes, M. FoodTech. Vise Prezidente FNM. Magnífiku Reitór UNPAZ, Dr. Adolmando Soares Amaral, Lic. Eco.,MM. Dekanu Fakuldade neen ho estrutura fakuldade nian. Vise Reitóres sira. Pro-Reitores sira. Diretor no Xefe Unidade sira. Dosente. Funsionariu inklui Estudante sira