REITOR UNPAZ HO ESTRUTURA PARTISIPA IHA APREZENTASAUN RELATORIU MONITORIZASAUN

REITOR UNPAZ HO ESTRUTURA PARTISIPA IHA APREZENTASAUN RELATORIU MONITORIZASAUN

Dili-Universidade da Paz (UNPAZ) Magnífiku Reitór, Dr. Adolmando Soares Amaral, Lic Eco.,MM. ho estrutura partisipa iha aprezentasaun rezultadu monitorizasaun ne’ebé halao husi ekipa tekniku Ministériu Edukasaun Superiór Siensia no Kultura (MESSK) ba iha kampus sentral nomós kampus ramu Raeoa no Covalima, iha Salaun Konferensia MESSK (14/07).

Iha aprezentasaun ne’e, Magnífiku Reitór, hateten ita hetan notifikasaun husi MESSK liu-liu diresaun jeral ensinu superór DG ho asesor nomós ekipa sira, ne’ebé foin dadauk ba halo avaliasaun no inspesaun, tanba ne’e ohin iha ekontu ida atu haree fila fali rezultadu sira ne’e hotu, ita bele simu ka lae, maibe enjeral iha buat barak ita la simu, no iha buat balu ita tenki simu, para hadia, tanba buat barak, ita la simu ne’e, tanba ita kompleta ona, ho ida ne’e mak ohin ita husu, UNPAZ atu tuir loos desizaun ida ne’ebé, desizaun husi avaliadór sira halo ka, desizaun ida husi ekipa ministeriu ba halo inspesaun, tanba iha rejultadu rua mak rekomenda mai iha UNPAZ, ho ida ne’e UNPAZ atu halo tuir ida ne’ebé mak loos.

Nia husu tenki iha konsensu ida para hetan konkluzaun ida katak, UNPAZ ne’e utiliza mak desizaun ida ne’ebé loos, tanba ministeriu kontratu tiha ema hodi mai halo avaliasaun, no fó ona rekomenasaun ba universidade, tenki kompleta buat balun para bele hetan lisensia operasionais, maibe ministru anterior ho ekipa ba halo fali inspesaun, depois mai rezultadu inspesaun ne’e la notifika ba ita no bolu ba halo diskusaun, derepente públika iha jornal da repúblika, tenki ensera atividade iha kampus ramu sira.

“Ohin ita halo diskusaun ho sira katak, hahalok hanesan ne’e, ita la konkorda, ensinu superior públiku sub-ordinariu ba ministeriu ensinu superior, maibe privadu ne’e parseiru ba iha ne’ebá, ho ida ne’e mak ita husu ministeriu ensinu superiór, tenki trata nia parseiru sira ho dignu labele politiza sasan sira hotu, ho ida ne’e ita bele dehan durante ne’e, imi servisu la ho onestu, tanba ne’e imi duvida ho rezultadu avaliador sira ba halo avaliasaun, se hanesan ne’e prontu imi bolu ami hanesan imi nia parseiru, tur hamutuk diskute para buka solusaun hamutuk, tanba ministeriu ensinu superior nia papel mak, atu kontrola, regula ho lei sira, iha buat balu falta fó hanoin ba ita, depois sebele fó apoiu ita, la’os mai politiza de’it, buat ruma falta haruka ensera, oinsa mak ita bele dezenvolve ensinu superior iha timor”,dehan Reitór.

Reitór argumenta, ho desizaun ne’ebé iha, husi parte ensinu superór la prontu foti desizaun, ho ida ne’e husi universidade husu submete fila fali proposta, depois ba halo avaliasaun foun, tanba ministeriu rasik mós la prontu atu foti desizaun katak, atu utiliza avaliador sira fó ka, ida ministru ba halo inspesaun ne’e, ho ida ne’e proposta sei submete iha tempu badak, hodi halo avaliasaun foun.

Iha fatin haesan, Diretora Jerál Ensinu Superiór no Siénsia, Sra. Maria Filomena Lay Guterres, afirma Objetivu ohin ita hasoru malu iha fatin ida ne’e, nu’udar momentu importante tebes, saida mak ekipa ba halo monitorizasaun iha UNPAZ sentral no UNPAZ sanak sira, ho ida ne’e ita hotu hanesan parseiru ita apoiu malu, tanba ita la’os servi de’it ita nia instuisaun, maibe ita servi ba estadu no ita nia nasaun. Ohin ita sei hato’o rezultadu monitorisaun ba aspeitu pozitivu nomós negativu, bazeia ba situasaun real ne’ebé mak iha, tanba ne’e ita nafatin rona malu iha momentu ida ne’e.

Partisipa iha aprezentasaun rejultadu monitorizasaun ne’e, Magnífiku Reitór, Universidade da Paz, Dr. Adolmando Soares Amaral, Lic Eco.,MM. ho estrutura nomós Diretora Jerál Ensinu Superiór no Siénsia, Sra. Maria Filomena Lay Guterres, ho ekipa tomak (MESSK).