REITOR ABERTURA FORMASAUN EDUKASAUN SIVIKA KONA-BA MUDANSA KARAKTER BA FOINSAE HO METUDU ESKUTISMU

REITÓR ABERTURA FORMASAUN EDUKASAUN SIVIKA KONA-BA MUDANSA KARAKTER BA FOINSA’E HO MÉTUDU ESKUTISMU

Dili-Universidade da Paz (UNPAZ) liuhusi União Nasional Escuterus Timor-Leste (UNE-TL) organiza Formasaun Edukasaun Sivika Kona-ba Mudansa Karakter Ba Foinsa’e Ho Métudu Eskutismu, ho Objetivu husi atividade ne'e, oinsa atu bele muda no halo mudansa ba karakter foinsa’e sira nian, atu bele konstroi sosiedade ne’ebé moris iha pas harmonia no tranquilidade, iha Salaun José Kasimiru (30/11/24).

Iha eventu ne’e, Magnífiku Reitór UNPAZ, Dr. Adolmando Soares Amaral, Lic. Eco.,MM. hateten atividade ida ne’e, oinsa bele transforma mentalidade joventude liuliu iha formasaun karakter, tanba iha fenomena ida ne’ebé úniku tebes ita hotu mai husi foho, iha tinan primeiru ita disiplina loos, maibe depois de ida ne’e adapta ona ambinte transforma ona ita nia mentalidade ne’e halo ita haluha disiplina ne’ebé ita lori husi foho mai iha dili.

“Ida ne’e akontese tanba evolusaun tenkonologia ne’ebé abansadu ho karakter mentalidade joventude fó influensia bo’ot ba ita mós bele sai hanesan sira lalais liu, situasaun ida ne’e mak sai preokupasaun ba ema hotu-hotu iha Timor-Leste”,dehan Reitór UNPAZ.

Reitór esklarese, ita bo’ot sira hanesan futuru nasaun ida ne’e, atu ukun nasaun ida ne’e iha tempu sira tuir mai mak ita bo’ot sira, se ita agora la tau atensaun no forma karakter no mentalidade maka ita tauk iha tempu sira tuir mai iha imi nia tempu, imi sei estraga nasaun ida ne’e, maibe ha’u fiar katak liuhusi formasaun ida ne’e bele muda imi nia mentalidade no hanoin sira.

“Ami na’in hira ne’ebé iha ne’e iha dever no moral atu fahe netik hanoin ruma ba imi, numinimu bele trasnforma imi nia hanoin no muda imi nia mentalidade atu imi bele prepara aan atu sai líder no lideransa ida ne’ebé mak di’ak iha futuru, tanba ne’e, buat ne’ebé imi hetan iha formasaun ohin tau ba no lori ba fahe tutan, tanba ita hotu iha responsabilidade ba rai ida ne’e, liuliu ba hanoin di’ak sira atu bele kontribui ba rai ida ne’e no ba povu ida ne’e atu bele moris di’ak”,tenik.

Iha fatin hanesan, Vise Prezidente UNE-TL Munisípiu Dili, Dr. Leonito Ribeiro, SH.,MH. reprezenta Prezidente UNE-TL, Munisípiu Dili, hateten atividade edukasaun sivika ne’e, organiza husi UNE-TL no hetan suporta orsamentu husi Ministeriu Juventude Desportu e Kultura.

“Materia ida ne’e importante tebes ba estudante ne’ebé iha situsaun agora komesa lakon ona ninia espiritu nasionalizmu, tanba ne’e liuhusi UNE-TL responsabiliza aktu sira ne’ebé akontese, oinsa bele halo sosializa no harmoniza situasaun ida ne’e la hotu, maibe UNE-TL hala’o neneik liuliu iha Munisípiu Dili halo ona iha eskola ualu iha Dili laran inklui UNPAZ”,katak Vise Prezidente UNE-TL.

Entretantu iha atividade ne’e, Partisipa husi, Magnífiku Reitór UNPAZ, Dr. Adolmando Soares Amaral, Lic. Eco.,MM. Oradores sira hanesan Komandante Investigasaun Munisípiu Dili, Xefe Tranjitu Munisípiu Dili, Xefe komisaun sira hotu, Membru UNE-TL, inklui Estudante Universidade da Paz.