REITOR ABERTURA ATIVIDADE ANJHN BA PROGRAMA KUDA AI-OAN IHA LIKISA NASUTA

REITÓR ABERTURA ATIVIDADE ANJHN BA PROGRAMA KUDA AI-OAN IHA LIKISA NASUTA

Dili-Universidade da Paz (UNPAZ) nia Magnífiku Reitór, Dr. Adolmando Soares Amaral, Lic. Eco.,MM. halo abertura ba atividade Asosiasaun Nasional Juventude Hadomi Natureza (ANJHN) ba programa kuda ai-oan iha Likisa Nasuta, hodi komemora "Loron Domin, Aniversáriu Universidade nomós Loron Kuarta Feira Sinzas",iha Salaun José Kasimiru (14/02).

Magnífiku Reitór Universidade da Paz, Dr. Adolmando Soares Amaral, Lic. Eco.,MM. hateten ita bo’o sira nu’udar juventude ida ne’ebé marka diferensia ho juventude sira seluk, ohin ema investe tempu no enerjia para bele kontente hamutuk, maibe imi na’in hira deside katak, buat ida selebra loron domin ne’e la presiza ema ho ema, maibe buat ida uniku tebes imi atu halo imi fila fali ba hadomi imi nia ambiente no natureza, ambiente iha timor hetan estragus tanba aktu husi ema timor rasik, maibe imi hakarak harmoniza situasaun ida ne’e, imi hakarak lori fali timor ne’e hanesan tempu beiala sira nian, ne’ebé sira sempre moris ho natureza.

"Imi sei ba hala’o atividade iha Likisa Nasuta, buat ida imi hatudu ba imi nia maluk joven sira seluk katak, momentu ida ne’e ema investe tempu no enerjia para bele hamutuk, maibe imi deside atu ba kuda ai-oan, buat ida ke la’os juventude hotu-hotu iha rai ida ne’e, talves iha mundu atu halo ida ne’e, ne’e uniku tebes, koko ba hadomi ita nia natureza no hatudu ba juventude sira seluk katak, ita juventude hotu, mais ita nia pensamentu no karakter la hanesan",dehan Reitór.

Líder masimu ne’e husu, moris iha ai-laran tuan, imi mak tenki kopriende oinsa atu moris ho natureza, tanba ne’e husu ba imi ba ho responsabilidade, lori nafatin naran universidade nian, no hamorin nafatin naran universidade iha ema sira ne’ebé imi atu moris hamutuk ba, no imi sei halo asaun kuda ai-oan iha komunidade sira no sira bele fó apresiasaun ba ita.

Prezidente Exekutivu ANJHN, Grazinha da Silva Conceição, hatutan objetivu atu halo akampamentu/mini kemping ida ne’e, atu komemora loron domin nian nomós aniversáriu Universidade da Paz nian, inklui loron sinzas ne’ebé katolika selebra, tanba Asosiasaun Juventude Hadomi Natureza, kria programa ida ne’e ho tema, Domin la’os de’it mak mai husi fuan, maibe domin mós mai husi asaun, asaun ne’e mak atu festeza hamutuk ho partisipante/komunidade sira liuhusi programa kuda ai-oan.

Entretantu iha ativiadde ne’e, partisipa husi Magnífiku Reitór Universidade da Paz, Dr. Adolmando Soares Amaral, Lic. Eco.,MM. akompaña husi Xefe Gabinete Reitoria, Prezidente Exekutivu ANJHN, Grazinha da Silva Conceição, ho ekipa tomak ANJHN nian.