PROSPEK APREZENTA REZULTADU PESKIZA IHA UNPAZ

PROSPEK APREZENTA REZULTADU PESKIZA IHA UNPAZ

Dili-Universidade da Paz (UNPAZ) liuhusi Organizasaun Non Governmental (PROSPEK) servisu hamutuk ho UNPAZ, organiza Seminariu kona-ba Peskiza ho Topiku”Integra Produtu Lokal Ba Programa Merenda Eskolar Hodi Hadia Rendimentu Agrikultor Sira-Nian Iha Munisípiu Lautem, ne’ebé hetan suporta husi USAID. Iha Salaun José Kasimiru (24/01/25).

Programa Espesifíku fó Prioridade ba Ema Kiak (PROSPEK) servisu hamutuk ho UNPAZ, organiza Seminariu Servisu Hamutuk entre ONG PROSPEK no UNPAZ Ba Peskiza Ho Topiku”Integra Produtu Lokal Ba Programa Merenda Eskolar Hodi Hadia Rendimentu Agrukultor Sira-Nian Iha Munisípiu Lautem, ne’ebé hetan suporta husi USAID.

Vise Reitor Asuntu Kooperasaun Interna & Externa, Sr. Luis Pereira Cardoso, Lic, CSH. MA.,Mcs. Ne’ebé reprezenta Magnífiku reitór iha abertura seminariu ne’e esplika, PROSPEK hanesan parseiru ida ho UNPAZ, ne’ebé ita asina akordu iha tinan kotuk inklui ONG lokal sira seluk ne’ebé mak UNPAZ nia parseiru mós, maibe PROSPEK ne’e sira-nia objetivu husi koperasaun ne’e, atu haree/reviu kona-ba rezultadu peskiza ne’ebé mak sira halo ona. Tanba ne’e mak ohin husi ONG PROSPEK ho UNPAZ organiza seminariu ida ne’e atu aprezenta rezultadu peskiza nian.

“Peskiza ne’ebé mak ita halo ona reviu sei públika iha jornal Internasional UNPAZ nian, nune’e ema hotu bele asesu inklui nasaun sira seluk mós bele asesu kona-ba rezultadu ida ne’e. Husu ba imi atu partisipa masimu, nune’e bele husu barak kona-ba rezultadu saida mak peskizadór sira hetan iha terenu liu-liu kona-ba produtu lokal sira ne’ebé mak utiliza ba merenda eskolar nian. seminariu ida ne’e importante tebes ba akadémiku sira atu bele hatene tuir nomós sai hanesan referensia di’ak ida ba ita bo’ot sira”,dehan Vise Reitór Kooperasaun.

Iha parte seluk, Diretor PROSPEK, Sr. Justino Villa Nova, akresenta PROSPEK hanesan Organizasaun Non Govermental ida ne’ebé servisu iha baze/komunidade, PROSPEK mós hanesan pasivu ba dezenvolvimentu ba ita nia governu hamutuk ho doador no ajensia dezenvolvimentu sira nomós instituisaun relevante sira inklui UNPAZ, nune’e mak PROSPEK bele implementa programa oi-oin iha Munisípiu sira.

“PROSPEK iha programa oi-oin ligadu ho agrikultura nomós advokasia ne’ebé halai liu kona-ba peskiza nian, liu-liu kona-ba oinsa ita integra ita nia produtu agrikultura sira ne’e ba merenda eskolar, nune’e ita nia agrikultor/komunidade sir abele hetan rendimentu inklui hadia mós nutrisaun ba labarik nomós ba feto sira”,tenik Diretor PROSPEK.

Entretantu iha seminariu refere, Partisipa husi Vise Reitor Asuntu Kooperasaun Interna & Externa, Sr. Luis Pereira Cardoso, Lic, CSH. MA.,Mcs. Ho Estrutura, , Diretor PROSPEK, Sr. Justino Vilanova, ho ekipa, nomós reprezentante husi USAID inklui estudante sira iha Universidade da Paz.