PANEL SIRA FINALIZA ONA AVALIASAUN BA PROGRAMATIKA JESTAUN

PANEL SIRA FINALIZA ONA AVALIASAUN BA PROGRAMATIKA JESTAUN

Dili-Universidade da Paz (UNPAZ) Liuhusi Agência Nacional Para a AValiação e Acreditação Académica (ANAAA.l.P), ne'ebé fó konfiansa ba avaliadór na'in tolu, hodi halo avaliasaun ba Programátika Jestaun Fakuldade Ekonomia ne’ebé hala’o durante loron rua finaliza ona, Iha Aula Prof. Dr. Lucas da Costa (17/08).

Magnífiku Reitór Universidade da Paz Dr. Adolmando Soares Amaral, Lic,Eco.,MM informa, tinan ida ne’e Universidade lori programa estudu neen ba re-akreditasaun programa estudu haat iha Ekonomia mak Jestaun, Kontabilidade, Bankaria nomós Empreendedorizmu, nune’e iha Enjeñaria mak Programa estudu rua Arkitetura no indústria. Programa estudu neen ne’e ba re-akreditasaun tanbá iha departamentu balun tinan lima ona ho estatutu C no iha balun tinan lima ona ho estatutu B.

“Agora ita ba re-akreditasaun fali atu nune’e aumenta fai tinan lima ba oin, husi rezultadu avaliasaun programátika hira ne’ebé mak ita liu ne’e rekomendasaun iha 88% husi avaliadór sira apresia ho mudánsa ne’ebé mak akontese ho nune’e iha rekomendasaun lubuk ida ita presija konsidera mós hodi ita hadi’a ba tinan lima mai. Ba Avaliasaun jerlamente buat hotu di’ak, maibé buat hotu rekomendasaun sempre iha tanba ita tenki konsidera ba rekomendasaun sira tanbá liuhusi rekomendasaun mak ita hatene ita-nia frakeza sira”, tenik Magnífiku.

Avaliadór Nasionál Dr. Hello Augusto da Costa X. Mau-Quei, afirma avaliasaun re-akreditasaun ba programa estudu jestaun ne’e ba dala rua, signifika katak universidade liu-liu departamentu hatene ona parte sira ne’ebé mak uluk ita aponta hela, departamenu ida ne’e uluk halo ona avaliasaun iha 2016 momentu ne’e iha avaliasaun lubuk ida ita fiar katak husi departamentu hatene ona rekomendasaun husi ANAAA saida mak sira tenki halo.

“Iha avaliasaun ba dahruak ne’e ita hanoin katak fásil liu kompara ho avaliasaun dahuluk nian, husi observasaun ne’ebé ita hetan katak kompara ho tinan hirak liubá kotuk agora iha mudansas lubuk ida hanesan infraestutura, ekipamentus, fasilidades, dokumentus sira maiória maibé presija hadi’a di’ak liután no dezenvolve di’ak liután atu nune’e ba futuru karik hetan oportunidade halo re-akreditasaun sei bele dezempeña di’ak liután. Presaun pesoal hanesan avaliadór nasionál haree katak iha mudansa lubuk ida iha ne’ebá, nune’e la’os para to’o ohin de’it maibé ne’e responsabilidade hotu-hotu nian atu servisu hamutuk hodi halo dezenvolvimentu iha departamentu no Univrsidade liu-liu iha Unpaz”,dehan Avaliadór Nasionál ne'e.

Entretantu iha avaliasaun Programátiku Departamentu Jestaun ne'e, avaliadór na'in tolu mak hanesan, Prof. Dr. Hazman Sha V. Bin Abdullah (Avaliadór Internasionál) Dr. Hello Augusto da Costa X. Mau-Quei. (Avaliadór Nasionál) Sr. Angelino dos Santos. (Avaliadór Nasionál).

Partisipa iha avaliasaun programátiku departamentu jestaun fakuldade ekonomia Universidade da paz, ba loron ikus nian, Magnífiku Reitór, Dr. Adolmando Soares Amaral, Lic.Eco.,MM. Vise Reitores sira, Dekanu Fakuldade neen, ho estrutura fakuldade nian, Pro-reiotres sira, Diretor/a Unidade sira, Ekipa ANAAA, Dosente inklui Funsionariu sira.