PANEL NASIONAL NO INTERNASIONAL HUSI ANAAA AVALIA AKREDISAUN PROGRAMATIKU JESTAUN IHA UNPAZ

PANEL NASIONAL NO INTERNASIONAL HUSI ANAAA AVALIA AKREDISAUN PROGRAMATIKU JESTAUN IHA UNPAZ

Dili-Universidade da Paz (UNPAZ) nia Fakuldade Ekonomia Departamentu Jestaun, hakat ba re-akreditasaun prosesu avaliasaun akreditasaun programátika no institusionál tinan akadémiku 2023, ne'ebé avalia husi avaliadór Nasionál nomós Internasionál husi ANAAA nian, Iha Aula Prof. Dr. Lucas da Costa (16/08).

Reprezenta Diretór Ezekutivu ANAAA, I.P, Dr. Nilton Diamantino Paiva Mai, Ph.D. Sra. Dirce M. da Silva Belo, Ofisiál Kualidade, hateten Diretór Ezekutivu ohin la marka prezénsa iha avaliasaun programátiku jestaun nian, tanba iha atividade ne'ebé mak hanesan, loke abertura iha instituisaun seluk, tanba ne'e ohin nia labele prezénsa iha fatin ida ne'e.

Nia esplika, ohin iha ekipa ne'ebé atu avaliasaun akreditasaun programátika jestaun (S1) iha UNPAZ, depois de tinan tolu iha Covid nia laran hala'o avaliasaun liuhusi Zoom, maibé iha tinan ida ne'e, ita agradese prosesu avaliasaun ho panel sira face to face, ho avaliadór nasionál nomós internasionál sira.

"Ita fiar katak husi avaliasaun ida ne'e, hahú ohin no aban sei hetan rekomendasaun lubuk ida ne'ebé ita bele simu no kompriende, hodi bele hadi'a di'ak liután instituisaun no programa ne'ebé iha ba futuru, tanba ne'e ha'u fiar, avaliadór sira la'ós ema foun, maibé sira ema ne'ebé sempre halo avaliasaun ba kursu sira durante ne'e, ho ida ne'e sira-nia prezénsa iha ne'e, bele kontribui ba iha prosesu avaliasaun ba programátika jestaun nian",tenik.

Iha fatin hanesan, Magnífiku Reitór Universidade da Paz, Dr. Adolmando Soares Amaral, Lic.Eco.,MM. hateten ami familia bo'ot UNPAZ hato'o bemvindu ba professor nia prezénsa mai iha universidade, iha rekomendasaun husi professor durante tinan sanulu liubá, ami hahú ona hari'i no hala’o, depois mak professór haree rasik nia mudánsa durante tinan sanulu nia laran, iha duni rezultadu ka la'e kona-ba rekomendasaun ba programa estudu ne'ebé ami aprezenta ona. Tan ne'e, dala ida tan ami hato'o bemvindu no agradese ba profesór nia ajuda ne'ebé fó hanoin kona-ba programa jestaun atu sai di’ak liután ba oin.

"Estrutura fakuldade ekonomia departamentu jestaun, ko'alia ba buat ne'ebé imi hakerek no hatan ba buat ne'ebé imi halo tiha ona, sira ne'ebé lahakerek la presiza imi ko'alia no ida ne'ebé imi la halo la presiza imi argumenta ho avaliadór sira. Sira ne'ebé ita la halo ita hein rekomendasaun, depois ita organiza aan, iha tempu sira tuir mai, no sira ne'ebé ita la hakerek ita hein rekomendasaun, depois ita bele hakerek no ita bele ko'alia iha tempu sira tuir mai",dehan Reitór UNPAZ.

Sorin Seluk, Prof. Dr. Hazman Sha V. Bin Abdullah (Avaliadór Internasionál) hanesan panel internasionál husi Malazya Indonesia, ha'u ohin mai halo avaliasaun iha Universidade da Paz ba dala rua ona, iha tinan sanulu liu ba kotuk, iha Saudozu Prof. Lucas nia tempu, ohin ha'u mai atu haree fila fali, oinsa mudansa ou susesu ne'ebé maka fakuldade ekonomia liuhusi departementu jestaun nian avansa iha tinan hirak nia laran. Ohin ha'u haree de'it UNPAZ nia edifísiu no jardin iha mudansa bo'ot iha tinan 10 liubá kotuk ne'ebé maka ha’u mai ba dala rua nian.

Entretantu iha avaliasaun Programátiku Departamentu Jestaun ne'e, avaliadór na'in tolu mak hanesan, Prof. Dr. Hazman Sha V. Bin Abdullah (Avaliadór Internasionál) Dr. Hello Augusto da Costa X. Mau-Quei. (Avaliadór Nasionál) Sr. Angelino dos Santos. (Avaliadór Nasionál).

Partisipa iha avaliasaun programátiku departamentu jestaun fakuldade ekonomia Universidade da paz, Magnífiku Reitór, Dr. Adolmando Soares Amaral, Lic.Eco.,MM. Vise Reitores sira, Dekanu Fakuldade neen, ho estrutura fakuldade nian, Pro-reiotres sira, Diretor/a Unidade sira, Stake older, Ekipa ANAAA, Dosente, Funsionariu inklui Alumi nomós Estudante sira, hodi apoiu departamentu ne'e.