ORGANIZASAUN JHN DEZAMINA INFORMASAUN BA ESTUDANTE UNPAZ

#UNPAZ# 25 OUTUBRU 2021

ORGANIZASAUN JHN DEZAMINA INFORMASAUN BA ESTUDANTE UNPAZ

Dili-Universidade da Paz (UNPAZ), liuhusi Organizasaun Juventude Hadomi Natureza (JHN), ne’ebé srvisu hamutuk ho Diretór Extra Kurikuler, Sr. Quintiliano F. Barros, Lic. SP M.SP, hodi dezamina informasaun kona-ba Juventude Hadomi Natureza (JHN), ba estudante sira iha UNPAZ, ho tema "Sosializasaun Edukasaun Bazika ba Juventude Hadomi Natureza" iha Salaun José Kasimeiru (25/10).

Diretór Extra Kurikuler, Sr. Quintiliano F. Barros, Lic. SP M.SP, hateten objetivu husi Juventude Hadomi Natureza mai iha UNPAZ, sira fahe informasaun ba juventude sira ne’e iha interese tebes ba rai ida ne’e liu-liu fatin sira ne’ebé potensial no fatin sira ne’ebé turizmu bele atrai ema seluk.

"Juventude mak nasaun nia futuru, mai ita hamutuk ho hanoin ida ho fuan ida koidadu ita nia natureza no proteze ita nia natureza importante tebes, atu proteze mak ita tenke iha abilidade ne’ebé sufisiente atu nune’e ita bele hamutuk ho ita nia maluk sira bele atinji ita nia objetivu ne’ebé iha ba Juventude Hadomi Natureza", tenik Diretór Extra Kurikuler.

Coordenadór Asuntu Estudu Peskiza, Juventude Hadomi Natureza (JHN), Sr. João da Costa Freitas, hatutan, objetivu mai halo sensiabilizasaun iha ne’e, atu rekruta membru foun ba Juventude Hadomi Natureza, maibe atraves de husi parte UNPAZ nian hakarak loke estudante hadomi natureza iha UNPAZ, ida ne’e ami mós sei fó formasaun ba sira, oinsa bele instala grupu hadomi natureza iha UNPAZ.

"UNPAZ hanesan Universidade Públiku ne’ebé bo’ot no estudante barak, ami haree husi parte ida ne’e katak, estudante sira ne’e ita bele akumula, tanba ita haree ba iha tinan kotuk ne’ebé akontese dezastre bo’ot ita presiza ema atu servisu voluntariu, maibe ita nia ema menus liu, ligadu ho problema sira ne’e mak atu instala Juventude Hadomi Natureza iha Universidade sira, no primeiru ami tama iha UNPAZ", Sr. João

Formasaun Juventude Hadomi Natureza iha UNPAZ Partesipa husi, Diretór Extra Kurikuler, Sr. Quintiliano F. Barros, Lic. SP M.SP. Coordenadór Asuntu Estudu Peskiza, Juventude Hadomi Natureza (JHN), Sr. João da Costa Freitas, ho Ekipa, nomós Estudante sira iha UNPAZ.