![MNEK HALO SOSIALIZASAUN PROGRESU SERVISU IHA UNPAZ](https://unpaz.tl/asset/foto_berita/056.jpg)
MNEK HALO SOSIALIZASAUN PROGRESU SERVISU IHA UNPAZ
Dili-Universidade da Paz (UNPAZ) liuhusi Ministériu Dos Negósiu Estrangeirus e Cooperacão VIII Governu Constitucional, halo "Sosializasaun Servisu MNEK Nian Kona-ba Polítika Externa Iha Area Multilateral, Bilateral, Asean, No Konsular ba Estudante no Funsionariu sira iha UNPAZ, atividade ne'e realiza iha Aula Prof. Dr. Lucas da Costa (02/06/23).
Dekanu FCSH, Dr. Fernando Dias Gusmão, A.Md.S.IP.M.AP. ne’ebé reprezenta Magnifiku Reitór UNPAZ, hateten UNPAZ kompromete atu sai parseiru ba iha ita nia governu, oinsa atu bele kontribui ba ita nia estadu. Hanesan instituisaun privadu UNPAZ mós dezenvolve nia an tuir kapasidade ne’ebé mak iha, hodi kontribui ba dezenvolvimentu iha ita nia nasaun.
“Agradese ba atividade ida ohin ne’ebé vise ministru ho ekipa mai fahe informasaun kona-ba atividade sira ne’ebé mak la’o durante ne’e, tanba ne’e atividade ohin importante tebes, para oinsa ami sira iha akademik mós bele akompaiña esforsu no sevisu sira ne’ebé mak Ministériu Negósiu Estrangeiru halo durante perioudu tinan lima”,dehan Dekanu FCSH, Dr. Fernando.
Iha fatin hanesan, Vise Ministro & Ministro Interino Dos Negósiu Estrangeiro E Cooperação De Timor-Leste, S.E. Julião Da Silva, agradese no kontente bele mai fali iha ha’u nia knua, hodi partilla informasaun ba kolega/maluk estudante sira hotu iha Universidade da Paz, oinsa esklarese servisu tomak ne’ebé mak durante ami hala’o iha manadatu ida ne’e.
Nia hatutan, ita nia servisu polítika externa durante ne’e ita nia sosiedade sira ne’ebé mak intende ituan kona-ba servisu polítika esterna nian, so ema ne’ebé klase mediu ba leten mak hatene liu, maibe ita nia sosiedade husi klase mediu mai kraik, ha’u hanoin sira menus tebes, tanba ne’e mak programa ida ne’e ita sosializa, ita hanaran programa MNEK ba povu, nune’e ema hotu bele hatene di’ak liu tán.
“Atu ko’alia kona-ba relasaun bilaterais/relasaun sira ne’e hotu atu di’ak, tenki partisipa masimu husi sidadaun ida-ida no autoridade sira hotu nomós sosiedade sira hotu nia partisipasaun, importante tebes atu bele hametin ita nia relasaun ne’e ho nasaun sira seluk, tanba ne’e prinsipiu sira ne’ebé mak importante liu, ba iha polítika externa provizoriamente ne’ebé ita nia governu bele halo, tenki hametin relasaun ho nasaun sira seluk, konitnuasaun hametin relasaun bilaterais, oinsa lori ita nia nasaun adere ba organizasaun internasional sira ne’ebé mak iha ONU nia laran”,tenik Nia.
Entretantu partisipa iha atividade sosializasaun husi MNEK ne’e, Dekanu FCSH, Dr. Fernando Dias Gusmão, A.Md.S.IP.M.AP. ne’ebé reprezenta Magnifiku Reitór UNPAZ. Vise Ministro & Ministro Interino Dos Negósiu Estrangeiro E Cooperação De Timor-Leste, S.E. Julião Da Silva. Ho ekipa sira hanesan, Diretor Interinu ba Assuntu Bilateral. Xefe Gabinete V-MNEK. Diretór Jeral Ba Assuntus Multilateral No Regional. Dosente no Funsionariu sira, Inklui Estudante sira husi Fakuldfade tolu, Fakuldade CSH, Direitu nomós Ekonomia.