MESSK HALO MONITORIZASAUN BA KONDISAUN UNIVERSIDADE DA PAZ

MESSK HALO MONITORIZASAUN BA KONDISAUN UNIVERSIDADE DA PAZ

Dili,12 Maiu 2025 - Universidade da Paz (UNPAZ) liuhusi ekipa Responsavel Universitariu, Ministeriu Ensinu Superior Siensia no Kultura, hala’o Monitorizasaun ba Universidade hodi haree kondisoens UNPAZ, Segunda feira ne'e iha Aula Prof. Dr. Lucas da Costa.

Dekanu FCSH, Dr. Fernando Dias Gusmão, S. IP.,M.AP. Reprezenta Magnífiku Reitór hateten, UNPAZ sempre iha disponivilidade no prontu atu deskute hamutuk ba asuntu edukasaun, tanba Universidade nu’udar parseiru, oinsa atu tau matan ba seitor Edukasaun liu-liu iha Ensinu Superior nian, tanba ne’e, kodisoens lubuk ida ne’ebé dadauk la’o iha UNPAZ, anteriormente iha fakuldade 6, maibe iha anu letivu 2025 nian UNPAZ hamosu tan fakuldade Floresta ho nia departamentu rua.

Reprezenta Magnífiku ne'e reforsa Departamentu iha UNPAZ hetan hotu ona Lisensa Operasional no maioria akreditasaun ona ba lisensiatura hamutuk 17 programa mestradu 7 no doutoramentu rua ne’ebé foin dadauk dez-entendimentu entre UNPAZ ho ministeriu, maibe grasadeus iha ona solusaun entre UNPAZ ho Ministeriu, oinsa bele kontinua programa doutorament nian.

Nia konta programa foun sira ne’ebé la’o hela seidauk hetan lisensa operasional, maibe iha ona faze diskusaun ho Ministeriu no iha tempu badak sei submete proposta lisensa operasional nian, ba programa estudu 6, rua husi Fakuldade Floresta, Departamentu 3 husi FSPeCM no programa MBBS ne’ebé koperasaun entre Unpaz ho India.

“Atividade Operasional prosesu aprendizajen ba semester I tuir hela prosesu aprendizajen ba Lingua ingles ne’ebé fasilita husi AHHA Education Timor-Leste, tanba lian Ingles mós tama ona iha kurikulum, ba semester III no VII tuir hela prosesu aprendizajen nomós semester V hala’o hela atividade PAK iha Munisípiu 12 inklui RAEOA”,dehan dekanu.

Iha fatin hanesan, Xefe departamentu Universitariu MESSK, Anguelica Delfina de Araújo, hateten ami nia prezensa iha UNPAZ, bazeia ba Lei, ne’ebé Estabelese ho nia artigu sira ne’ebé regula ho nia kompetensia, hodi haree ba funsionamentu atividade sira ne’ebé hala’o iha ensinu Superior Públiku no Privadu.

Nia dehan atividade monitorizasaun ne’e programa Ministeriu nian ho ida ne'e maka kada Tinan-Tinan Monitorizasaun ba Universitariu sira, tanba ne’e ami nia prejensa atu kontinua haree fila fali rezultadu final ne’ebé tinan kotuk ekipa sira mai halo ona monitorizasaun, atu haree hikas fali nia mudansa/progresu ami bele identifika no updaet fali ba iha Ministeriu, buat ne’ebé di’ak ita mellora di’ak liu tan no ida ne’ebé presiza halo mudansa no atu hadia ita kopera hamutuk di’ak liu tan ba futuru.

“Ami mós hakarak agredese no apresia ba UNPAZ, ligadu ho orsamentu subvensaun ne’ebé utiliza ho di’ak, tanba instituisaun balu devolve fila fali, maibe UNPAZ utiliza ho responsabilidade, tanba ne’e parabens ba UNPAZ ne’ebé utiliza orsamentu ho di’ak”,tenik Xefe responsavel universitariu MESSK.

Entertantu tuir observasaun média nian haree, ekipa MESSK, hamutuk ho Universidade kontinua kedas halo site visit hodi haree diretamente kondisoens fakuldade nian, hanesan aula ba Estrutura, Dosente, Funsionariu Administrasaun, Laboratorium, Biblioteka inklui aula prosesu aprendizajen.