![MESCC AVALIA UNPAZ RAMU RAEOA](https://unpaz.tl/asset/foto_berita/414.jpg)
MESCC AVALIA UNPAZ RAMU RAEOA
Dili-Universidade da Paz (UNPAZ) liuhuis Ministériu Ensinu Superór Ciensia Cultura (MESCC) hala’o site visit ba iha kampus ramu UNPAZ RAEOA hodi avalia ba lisensa operasional, iha RAEOA Oe-Cusse (09/12).
Magnifiku Reitór, Dr. Adolmando Soares Amaral, Lic.Eco.,MM, hatete, ita atu haree kondisaun sira ne’ebé ita organiza durante ne’e no ita nia preparasaun, oinsa atu bele hatan ba lisensa operasional ba kampus ramu sira, tanba ne’e, hotu-hotu avontade atu esklarese kona-ba ita nia kondisaun ne’ebé mak ita iha.
Nia hatutan, ita konsidera rekomendasaun sira hanesan mós saida mak akontese iha Covalima, rekomendasaun ne’ebé iha konsege ita rezolve ona, ita lori kedas mai iha RAEOA, ha’u hanoin avaliadór sira mós la sees husi kritéria operasionais ne’ebé iha padraun 11 nomós totál indikadores 57, orsida ita sei haree iha ne’ebá no ita tenki justifika ba argumentu sira ne’ebé ita submete tiha ona ba Ministériu, liuhusi proposta atu husu autorizasaun ba lisensa operasionál ba kampus ramu sira.
Reitór esplika liután, liuhusi rezultadu porposta ne’ebé iha mak universidade nasionál no kampus ramu RAEOA hamutuk ho ministériu ensinu superior hodi marka tan istória ida.
“Iha akontesimentu iha ohin lokraik ida ne’e ministeriu ensinu superior hamutuk ho estrutura universidade iha nasionál nomós iha ramu ita hahú marka istória foun katak, ita la hein maibé ita komesa atu book aan no organiza aan atu hatan ba ita-nia situasaun rasik hodi rezolve ba problema sira tuir mai, ita hotu-hotu nia hanoin mak buat hotu-hotu ita labele hein no hatudu de’it ba governu ka estadu, maibé hanesan setór privadu oinsá mak ita asegura polítika governu nian ba desentralizasaun”,dehan Reitór.
Ekipa Avaliadór Ministériu Ensinu Superór Ciensia Cultura (MESCC) Sr. Paulino Rebeiro, MAP. Klarifika, hakarak halo sumariu ba buat tolu de’it Rekursu umanu fahe tiha kedas ba sustentabilidade universidade ramu RAEOA nian, 1. Rekursu umanu garante estabilidade atu garante nia prosessu aprendizazem, garante nia administrasaun, garante ninia jestaun ne’ebé inklui buat barak. 2. Rekursu finanseiru ne’ebé atu garante funsionamentu estrutura nian. 3. Rekursu fasilidade.
Partisipa iha site visit ba iha kampus RAEOA ne’e, Estrutura Universidade ne’ebé kompostu husi, Vise Reitores sira, Dekanu Fakuldade Neen, Xefe Departamentu sira, Pro-Reitor sira, Diretor/Unidade sira, Dosente, inklui Ekipa husi (MESCC)