KANDIDATU ESTUDANTE FOUN DEPARTAMENTU ENFERMAGEN (FSPeCM) NAIN 297 PARTISIPA IHA TESTE EZAME INTERVI

KANDIDATU ESTUDANTE FOUN DEPARTAMENTU ENFERMAGEN (FSPeCM) NA’IN 297 PARTISIPA IHA TESTE EZAME INTERVISTA

Dili-Universidade da Paz (UNPAZ) liuhusi Fakuldade Saúde Públika e Ciênsia Medica (FSPeCM) realiza teste segundu no terseiru faze ba kandidatu estudante foun atus rua sia nulu resin hitu (297) Departamentu enfermagen ne’ebé mak pasa ona iha teste eskrita no ohin hakat ba teste segundu faze intervista no terseiru faze teste Médiku, iha Laboratorium FSPeCM (17/02) horseik.

Kordenador ekipa, Enf. Belarmino da Silva Pereira, Lic. SP, MMRS, hateten prosesu ida ne’e inisiativu foun ida ne’ebé atu aumenta valor ba Universidade da Paz nia produtu, liu-liu iha Fakuldade Saúblika ne’ebé mak durante ne’e existe ho nia departamentu neen, maibe ita haree katak komesa kedas husi nivel altu Magbnifiku Reitór ho estrutura sira haree katak, ita presiza halo ona valor adisional ida ba iha ita nia produtu sira.

Nia hatutan, Prosesu ida ne’e mós, prosesu ida ne’ebé maka lalais no parte hotu iha universidade no fakluldade, prontu atu realiza programa ida ne’e, maski inisitivu ne’e foin mosu, maibe ita hotu-hotu prontu realiza ida ne’e.Programa ida ne’ebé ita foin loke, hatudu ba públiku katak UNPAZ mós bele, tanba ho kandidatu ka estudante ne’ebé mak mai rejistu ne’e barak, tuir lista ne’ebé mak iha 297 kandidatura ba programa estudu enfermagen iha UNPAZ, ne’e hatudu katak, ita bele atrai ema, dpois ema mós bele laran monu ba UNPAZ hodi mai kompete iha fatin ida ne’e.

“Asuntu importante liu ne’ebé mak ita regirozu hare iha prosesu ida ne’e, mak atu sai enfermeiru/a hira ne’ebé mak profesionál, ida ne’ebé regirozu liu iha faze intervista ida ne’e mak haree tato, ami la tolera ba ema ne’ebé iha tato, tanba aban bain rua sira ne’e hasoru kliente, tanba saida ami la tolera, ema haree husi partes arte, bai-bain ema hateten tato ne’e mós arte ida. Mais haree husi etika profesionál pasiente haree ema enfermeiru ruma mak tato nia halo atendimentu dala ruma pasiente mós mosu interogasaun bo’ot ida iha nia hanoin, katak ema ne’e iha tato hanesan ne’e, nia ne’e infermeiru ka nia ne’e la’os infermeiru, ida ne’e mak regirozu ami hare liu, maibe ami fó atensaun maximu iha nia prosesu tomak”,tenik Nia.

Fontes ne’e reforsa, tuir fali mai ikus sira bele tama fali ba faze ida teste saúde ninian,tanba wa’in hira ema atu sai enfermeiru/a nia rasik tenkiser saúde di’ak ka Saudavel para bele atendimentu ba kliente sira.Tuir kriteria ida ne’ebe maka liu ona intervista ne’e wainhira nia valor maior ou iguala 75, signifika katak valor 75 ba leten maka foin bele liu. No 75 mai kraik sei la pasa iha intervista, no nia iha opsaun atu hili fali departamentu seluk iha fakuldade saúde públika.

Kandidatu Estudante foun, Ersiana Xmenes, husi Departamentu Enfermagen Fakuldade Saúde Públika e Ciênsia Medica, hateten, dahuluk ha’u sente orgullu no kontente tebes bele partesipa iha teste ida ne’e, tanba ho atendimentu sira ne’ebé mak di’ak tebes.

“Ami mak nu’udar kandidatu primeiru ba Departamentu Enfermagen iha UNPAZ ho ida ne’e mak haksolok tebes ohin ami bele tuir ona teste oral, ha’u fiar katak husi teste ida ne’e sei bele fó rezultadu ida ne’ebé mak pozitivu, departamentu ne’e rasik ha’u hili tuir ha’u nia mehi ne’ebé mak iha, no ba futuru atu sai ema infermeira ida ne’ebé mak profisionál iha Timor-Leste”,dehan Ersiana.

Nia hatutan, teste ida ohin ha’u sente di’ak tebe, sé ha’u pasa iha teste ida ne’e, ha’u sei kontribui iha universidade ida ne’e no halo tuir dutrina UNPAZ nian, no hatudu komportamentu ne’ebé mak di’ak iha Universidade da Paz.

Sorin seluk, Kandidatu foun, Charles Saldahna de Araújo Asae, reforsa, agradese ba loron ohin bele tuir ona teste ba ezame ne’ebé mak la’o ho di’ak, tanba departamentu ne’e rasik, ami mak nu’udar kandidatu dahuluk iha UNPAZ.